തുടർച്ചയായ രണ്ടാം വർഷവും ഫ്രഞ്ച് ഓപ്പൺ ഫൈനലിലേക്ക് മുന്നേറി കാസ്പർ റൂഡ്. നാലാം സീഡ് ആയ നോർവീജിയൻ താരം 22 സീഡ് ആയ സാഷ സെരവിനെ നേരിട്ടുള്ള സെറ്റുകൾക്ക് ആണ് സെമിയിൽ തോൽപ്പിച്ചത്. 24 കാരനായ താരം മത്സരത്തിൽ വലിയ ആധിപത്യം ആണ് പുലർത്തിയത്. ആദ്യ സെറ്റ് 6-3 നും രണ്ടാം സെറ്റ് 6-4 നും നേടിയ റൂഡ് മൂന്നാം സെറ്റിൽ സാഷയെ ബേഗൽ നേടി 6-0 നു നാണം കെടുത്തി.
മത്സരത്തിൽ 6 തവണ ജർമ്മൻ താരത്തിന്റെ സർവീസ് ഭേദിച്ച റൂഡ് ഒരുതവണ മാത്രം ആണ് മത്സരത്തിൽ ബ്രേക്ക് വഴങ്ങിയത്. കഴിഞ്ഞ വർഷം ഫൈനലിൽ നദാലിനോട് കീഴടങ്ങിയ റൂഡ് കരിയറിലെ ആദ്യ ഗ്രാന്റ് സ്ലാം കിരീടം ആണ് ലക്ഷ്യം വക്കുന്നത്. കളിച്ച കഴിഞ്ഞ അഞ്ച് ഗ്രാന്റ് സ്ലാമുകളിൽ റൂഡിന്റെ മൂന്നാം ഫൈനൽ കൂടിയാണ് ഇത്. ഫൈനലിൽ തന്റെ 23 മത്തെ മേജർ കിരീടം ലക്ഷ്യം വക്കുന്ന നൊവാക് ജ്യോക്കോവിച് ആണ് കാസ്പർ റൂഡിന്റെ എതിരാളി.