നോവാക് ജോക്കോവിച്ച് കരിയറിലെ നൂറാം എടിപി ടൂർ-ലെവൽ കിരീടം എന്ന ചരിത്ര നേട്ടത്തിലേക്ക് ഒരു പടി കൂടി അടുത്തെത്തി. ജനീവ ഓപ്പൺ സെമിഫൈനലിൽ ബ്രിട്ടീഷ് ക്വാളിഫയർ കാമറൂൺ നോറിയെ 6-4, 6-7(6), 6-1 എന്ന സ്കോറിന് പരാജയപ്പെടുത്തിയാണ് ജോക്കോവിച്ച് ഫൈനലിൽ പ്രവേശിച്ചത്.
24 തവണ ഗ്രാൻഡ് സ്ലാം കിരീടം നേടിയ താരം, 38 വയസ്സ് തികഞ്ഞ് ഒരു ദിവസം പിന്നിടുമ്പോഴാണ് ഈ വിജയം സ്വന്തമാക്കിയത്. രണ്ട് മണിക്കൂറും 15 മിനിറ്റും നീണ്ട പോരാട്ടത്തിൽ ജോക്കോവിച്ച് 11 ഏസുകളും 34 വിന്നർ ഷോട്ടുകളും ഉതിർത്തു. ആദ്യ സെറ്റ് നേടിയ ശേഷം രണ്ടാം സെറ്റിൽ ടൈബ്രേക്കിൽ ലീഡ് നഷ്ടപ്പെട്ടെങ്കിലും മൂന്നാം സെറ്റിൽ മികച്ച പ്രകടനം കാഴ്ചവെച്ച് 6-1ന് സെറ്റ് സ്വന്തമാക്കി.
നാളെ നടക്കുന്ന ഫൈനലിൽ പോളണ്ടിൻ്റെ ഹ്യൂബർട്ട് ഹർകാസ് ആണ് ജോക്കോവിച്ചിൻ്റെ എതിരാളി. ഇതിനുമുമ്പ് ഏഴ് തവണ ഇരുവരും ഏറ്റുമുട്ടിയപ്പോഴും വിജയം ജോക്കോവിച്ചിനൊപ്പമായിരുന്നു.
