ബാഴ്സലോണ ഓപ്പൺ ഫൈനലിൽ അൽകാറസ് സിറ്റ്സിപാസിനെ നേരിടും. ശനിയാഴ്ച നടന്ന സെമി പോരാട്ടത്തിൽ നിലവിലെ ചാമ്പ്യൻ കാർലോസ് അൽകാറസ് 6-2, 6-2 എന്ന സ്‌കോറിന് ഡാൻ ഇവാൻസിനെ തോൽപ്പിച്ച് ആണ് സ്‌റ്റെഫാനോസ് സിറ്റ്‌സിപാസുമായി ഫൈനൽ ഉറപ്പിച്ചത്. നേരത്തെ ഗ്രീക്ക് രണ്ടാം സീഡ് ലോറെൻസോ മുസെറ്റിയെ 6-4, 5-7, 6-3 ന് പരാജയപ്പെടുത്തി ആയിരുന്നു സിറ്റ്സിപാസ് ഫൈനലിൽ എത്തിയത്.
കഴിഞ്ഞ വർഷം ബാഴ്‌സലോണയിൽ നടന്ന ക്വാർട്ടർ ഫൈനലിൽ ഇരുവരും ഏറ്റുമുട്ടിയപ്പോൾ മൂന്ന് സെറ്റുകൾക്ക് അൽകാറസ് ജയിച്ചിരുന്നു. ഇതുവരെ ഇരുവരും മൂന്ന് തവണ നേർക്കുനേർ വന്നപ്പോഴും അൽകാറസ് ആണ് ജയിച്ചത്.
സിറ്റ്സിപാസിന് ഇത് ബാഴ്സലോണ ഓപ്പണിലെ മൂന്നാം ഫൈനൽ ആണ്. 2018ലും 2021ലും ഫൈനലിക് സിറ്റ്സിപാസ് റാഫേൽ നദാലിനോട് പരാജയപ്പെട്ടിരുന്നു.
