Tag: Prime Volley

ഹൈദരാബാദ്: ആര്‍.ആര്‍ കാബെല്‍ പ്രൈം വോളിബോള്‍ ലീഗ് നാലാം സീസണ്‍ കിരീടം ബെംഗളൂരു ടോര്‍പ്പിഡോസിന്. ലീഗ് ഘട്ടത്തില്‍ ഒന്നാം സ്ഥാനക്കാരായി ഫിനിഷ് ചെയ്ത മുംബൈ മിറ്റിയോഴ്‌സിനെ നേരിട്ടുള്ള സെറ്റുകള്‍ക്ക് തോല്‍പ്പിച്ചാണ് ബെംഗളൂവിന്റെ കന്നിക്കിരിടം. സ്‌കോര്‍: 15-13, 16-4, 15-13. ലീഗ്ഘട്ടത്തില്‍ മുംബൈയോട് തോറ്റ് രണ്ടാം സ്ഥാനക്കാരാവേണ്ടി വന്ന ബെംഗളൂരിന് ഫൈനല്‍ വിജയം മധുരപ്രതികാരം കൂടിയായി. രണ്ടാം സെറ്റില്‍ നാലു പോയിന്റുകള്‍ മാത്രമാണ് മുംബൈക്ക് നേടാനായത്. മൂന്നാം സെറ്റില്‍ സ്‌കോര്‍ 14-13 വരെയെത്തിച്ചെങ്കിലും ഡേവിഡ് ലീയുടെ സംഘത്തെ തടയാനായില്ല. 2023 ഫൈനലില്‍ ബെംഗളൂരു അഹമ്മദാബാദ് ഡിഫന്‍ഡേഴ്‌സിനോട് തോറ്റിരുന്നു. അന്നും ഡേവിഡ് ലീ തന്നെയായിരുന്നു ടോര്‍പ്പിഡോസിന്റെ പരിശീലകന്‍.

ആദ്യ സെറ്റില്‍ ഇരുടീമുകളും ജാഗ്രതയോടെ കളിച്ചു. പീറ്റര്‍ ഓസ്റ്റ്വിക് ജോയല്‍ ബെഞ്ചമിനെ ബ്ലോക്ക് ചെയ്തപ്പോള്‍, ശുഭം ചൗധരിയുടെ ഷോട്ട് ബ്ലോക്ക് ചെയ്തുകൊണ്ട് ജിഷ്ണു ബംഗളൂരുവിനായി ശക്തമായി തിരിച്ചടിച്ചു. സേതുവിന്റെ സെര്‍വീസ് ബംഗളൂരുവിന് നേരിയ മുന്‍തൂക്കം നല്‍കി, ഇത് മിറ്റിയോഴ്‌സിനെ സൂപ്പര്‍ പോയിന്റിന് വിളിക്കാന്‍ നിര്‍ബന്ധിതരാക്കി. മുംബൈ ശക്തമായി പൊരുതിയെങ്കിലും, ബെംഗളൂരു ക്യാപ്റ്റനും സെറ്ററുമായ മാറ്റ് വെസ്റ്റിന്റെ കൃത്യതയാര്‍ന്ന പന്തെത്തിക്കല്‍ ടോര്‍പ്പിഡോസിനെ ആദ്യ സെറ്റ് നേടാന്‍ സഹായിച്ചു.

ബെംഗളൂരിന്റെ സര്‍വാധിപത്യമായിരുന്നു രണ്ടാം സെറ്റില്‍. സേതുവിന്റെ സൂപ്പര്‍ സെര്‍വിലൂടെയാണ് ബെംഗളൂരു തുടങ്ങിയത്. മുംബൈയുടെ ഭാഗത്തുനിന്നുണ്ടായ തുടര്‍ച്ചയായ പിഴവുകള്‍ ബെംഗളൂരുവിന്റെ സ്‌കോറിങ് വേഗത്തിലാക്കി. മുംബൈക്കായി ഓം ലാഡ് വസന്ത് അറ്റാക്കര്‍മാര്‍ക്ക് കൃത്യമായി പന്തെത്തിച്ചു, എന്നാല്‍ ശുഭവും ക്യാപ്റ്റന്‍ അമിത് ഗുലിയയും പന്തുകള്‍ ദൂരത്തേക്ക് അടിച്ച് പാഴാക്കി. ജോയലിന്റെ സ്ഥിരതയാര്‍ന്ന ആക്രമണങ്ങള്‍ മുംബൈയെ കൂടുതല്‍ പ്രതിരോധത്തിലാക്കുകയും ചെയ്തു. ജോയലിന്റെ സൂപ്പര്‍ സെര്‍വിലൂടെ ടോര്‍പ്പിഡോസ് രണ്ട് സെറ്റിന്റെ ലീഡുറപ്പിച്ചു. മൂന്നാം സെറ്റില്‍, ജാലെന്‍ പെന്റോസ് ശക്തമായ സ്‌പൈക്കുകള്‍ ഉതിര്‍ത്തതോടെ ടോര്‍പ്പിഡോസ് മുന്നേറ്റം തുടര്‍ന്നു. ശുഭം കൗണ്ടര്‍അറ്റാക്കിന് നേതൃത്വം നല്‍കിയെങ്കിലും മുംബൈയ്ക്ക് കാര്യമായ സ്വാധീനം ചെലുത്താനായില്ല. സൂപ്പര്‍പോയിന്റും മുംബൈയെ തുണച്ചില്ല, നിഖിലിന്റെ സര്‍വീസ് പിഴവിലൂടെ ബെംഗളൂരു ജയവും കിരീടവും ഉറപ്പിച്ചു.

Image Caption

പ്രൈം വോളിബോള്‍ ലീഗിന്റെ നാലാം സീസണ്‍ ഫൈനലില്‍ മുംബൈ മിറ്റിയോഴ്‌സിനെതിരെ വിജയം നേടിയ ബെംഗളൂരു ടോര്‍പ്പിഡോസ് താരങ്ങളുടെ ആഹ്ലാദം

ഹൈദരാബാദ്: ആര്‍.ആര്‍ കാബെല്‍ പ്രൈം വോളിബോള്‍ ലീഗ് നാലാം സീസണില്‍ ഹൈദരാബാദ്‌ ബ്ലാക്‌ ഹോക്‌സിനെതിരെ തകർപ്പൻ ജയവുമായി അഹമ്മദാബാദ്‌ ഡിഫൻഡേഴ്‌സ്‌. രണ്ട്‌ സെറ്റിന്‌ പിന്നിട്ടുനിന്ന ശേഷം ജയം സ്വന്തമാക്കുകയായിരുന്നു. സ്‌കോർ: 9–15, 7–15, 15–9, 15–11, 15–8. ബട്ടുർ ബാറ്റ്‌സുറിയാണ്‌ കളിയിലെ താരം. കളിയുടെ ആദ്യപകുതി മുഴുവനും ഹൈദരാബാദാണ്‌ കളിച്ചത്‌. എന്നാൽ പാതിഘട്ടം കഴിഞ്ഞപ്പോൾ അവർക്ക്‌ താളം നഷ്ടമായി. അഹമ്മദാബാദ്‌ വമ്പൻ പോരാട്ടത്തിലൂടെ ജയം സ്വന്തമാക്കുകയും ചെയ്‌തു.

ഹൈദരാബാദ്‌ നിരയിൽ ഗുരു പ്രശാന്ത്‌ തിരിച്ചെത്തിയതോടെ അവരുടെ ആക്രമണം കടുത്തു. അതേസമയം അഹമ്മദബാദിന്റെ വിക്ടർ യുഡി യമാമോട്ടോയും നിയാസ്‌ അബ്‌ദുൾ സലാമും ഹൈദരാബാദ്‌ പ്രതിരോധത്തെ പരീക്ഷിച്ചു. ആതിഥേയർക്ക്‌ ജോൺ ജോസഫും ശിഖർ സിങ്ങും തകർപ്പൻ കളി പുറത്തെടുത്തു. പ്രീത്‌ കിരൺ മികച്ച പാസിങ്ങുമായി കളംനിറഞ്ഞു. സഹിൽ കുമാറിന്റെ സൂപ്പർ സെർവ്‌ അഹമ്മദബാദിനെ തകർക്കുകയും ചെയ്‌തതോടെ ഹൈദരാബാദ്‌ കളിയിൽ നിയന്ത്രണം നേടി.

കളിയിൽ പിടി നഷ്ടമാകുന്ന ഘട്ടത്തിലാണ്‌ അഹമ്മദബാദ്‌ ക്യാപ്‌റ്റനും സെറ്ററുമായ മുത്തുസാമി അപ്പാവു കളംനിറയുന്നത്‌. ഇടംകൈയൻ യൂണിവേഴ്‌സൽ ഹാർഷ്‌ ച‍ൗധരിയെ കൊണ്ടുവന്നതോടെ അഹമ്മദബാദ്‌ കളി പിടിക്കാൻ തുടങ്ങി. മനോഹരമായ സൂപ്പർ സെർവിലൂടെയായിരുന്നു ഹാർഷ്‌ ടീമിനെ തിരിച്ചുകൊണ്ടുവന്നത്‌.
തക്കസമയത്ത്‌ ബാറ്റ്‌സുറി താളം കണ്ടെുത്തുകയും ചെയ്‌തതോടെ കളി മുറുകി. അഖിനും അഭിനവും തകർപ്പൻ ബ്ലോക്കിങ്ങിലൂടെ കളിഗതി അഹമ്മദാബാദിലേക്ക്‌ മാറ്റാൻ തുടങ്ങി. ഹാർഷിന്റെ രണ്ടാം സൂപ്പർ സെർവ്‌ കളിയെ അഞ്ചാം സെറ്റിലേക്ക്‌ നീട്ടി. ഹാർഷിന്റെ മാജിക്ക്‌ അഞ്ചാം സെറ്റിലും തുടർന്നു. മറ്റൊരു മിന്നുന്ന സൂപ്പർ സെർവ്‌ ആതിഥേയരെ നിശബ്‌ദരാക്കി. ബാറ്റ്‌സുറിയുടെ സൂപ്പർ സെർവും ഹൈദരാബാദിനെ വിറപ്പിച്ചു. അഹമ്മദാബാദ്‌ ആവേശകരമായ ജയം സ്വന്തമാക്കുകയും ചെയ്‌തു.

കാലിക്കറ്റ് ഹീറോസിനെതിരെ
ആധികാരിക ജയവുമായി ഡല്‍ഹി തൂഫാന്‍സ്

ഹൈദരാബാദ്: ആര്‍.ആര്‍ കാബെല്‍ പ്രൈം വോളിബോള്‍ ലീഗ് നാലാം സീസണില്‍ നിലവിലെ ചാമ്പ്യന്‍മാരായ കാലിക്കറ്റ് ഹീറോസിന് തുടര്‍ച്ചയായ നാലാം തോല്‍വി. ഡല്‍ഹി തൂഫാന്‍സ് നേരിട്ടുള്ള സെറ്റുകള്‍ക്ക് തോല്‍പ്പിക്കുകയായിരുന്നു (1511, 159, 1511). ഹെസ്യൂസ് ചൗറിയോ ആണ് കളിയിലെ താരം. ആദ്യ മൂന്ന് കളിയും തോറ്റ കാലിക്കറ്റിന് സെമിഫൈനല്‍ സാധ്യത നിലനിര്‍ത്താന്‍ ജീവന്‍മരണപ്പോരാട്ടമായിരുന്നു. ജയത്തോടെ ഡല്‍ഹി മൂന്നാം സ്ഥാനത്തെത്തി. ജയത്തിനായി കൊതിച്ചിറങ്ങിയ കാലിക്കറ്റ് തുടക്കത്തില്‍ സന്തോഷിന്റെ സ്മാഷുകളിലൂടെ ലീഡ് നേടിയതാണ്. വികാസ് മാന്റെ ബ്ലോക്കുകളും പ്രതീക്ഷ നല്‍കി. പക്ഷേ, ക്യാപ്റ്റന്‍ സഖ്‌ലെയ്ന്‍ താരിഖിന്റെ തന്ത്രപരമായ നീക്കങ്ങളില്‍ ഡല്‍ഹി കളം പിടിച്ചു. മുഹമ്മദ് ജാസിം നയിച്ച ട്രിപ്പിള്‍ ബ്ലോക്ക് ഡല്‍ഹിക്ക് സൂപ്പര്‍ പോയിന്റ് നല്‍കുകയും ചെയ്തു. ഇതോടെ കാലിക്കറ്റിന്റെ താളവും തെറ്റി.

പിന്നാലെ ചൗറോയിയുടെ കരുത്തില്‍ ആഞ്ഞടിക്കുന്ന ഡല്‍ഹിയെയാണ് കണ്ടത്. കാലിക്കറ്റ് പ്രതിരോധം അതില്‍ ചിതറിപ്പോയി. പിറന്നാള്‍ദിനം ആഘോഷമാക്കി ജോര്‍ജ് ആന്റണി തുടര്‍ച്ചയായ രണ്ട് സൂപ്പര്‍ സെര്‍വുകള്‍ തൊടുത്തപ്പോള്‍ കളി ഡല്‍ഹിയുടെ കളത്തിലായി. കാലിക്കറ്റ് ലിബെറോ ആദര്‍ശും ഡല്‍ഹി ലിബെറോ ആനന്ദും തകര്‍പ്പന്‍ പ്രകടനമാണ് പുറത്തെടുത്തത്. കാലിക്കറ്റ് കളിപിടിക്കാന്‍ ആവുംവിധം ശ്രമിച്ചു. സന്തോഷിന്റെ സൂപ്പര്‍ സെര്‍വില്‍ അതിനുള്ള ഒരുക്കം കണ്ടതാണ്. പക്ഷേ, അധികം ആയുസുണ്ടായില്ല. ഷമീമുദീന്റെ ചില ബ്ലോക്കുകള്‍ ഡല്‍ഹി അറ്റക്കാര്‍ക്കര്‍മാര്‍ക്ക് നേരിയ സമ്മര്‍മുണ്ടാക്കിയതൊഴിച്ചാല്‍ കാലിക്കറ്റിന്റെ നീക്കങ്ങള്‍ ദുര്‍ബലമായിരുന്നു. ഡല്‍ഹി ക്യാപ്റ്റന്‍ സഖ്‌ലയ്ന്‍ മധ്യഭാഗത്ത് കാര്‍ലോസ് ബെരിയോസ് അവസരങ്ങളൊരുക്കി. പിന്നാലെ റഹീമിന്റെ ശ്രമത്തിന് കരുത്തുറ്റ പ്രതിരോധം തീര്‍ത്ത് ആയുഷ് മിന്നിയതോടെ സൂപ്പര്‍ പോയിന്റ് പിടിച്ച് ഡല്‍ഹി ജയം പൂര്‍ത്തിയാക്കുകയായിരുന്നു. ഇന്ന് വൈകിട്ട് 6.30ന് ബെംഗളൂരു ടോര്‍പിഡോസ് ചെന്നൈ ബ്ലിറ്റ്‌സിനെ നേരിടും.

ഹൈദരാബാദ്: ആര്‍.ആര്‍ കാബെല്‍ പ്രൈം വോളിബോള്‍ ലീഗ് നാലാം സീസണില്‍ കൊച്ചി ബ്ലൂ സ്‌പൈക്കേഴ്‌സിന് മൂന്നാം തോല്‍വി. ശനിയാഴ്ച്ച നടന്ന മത്സരത്തില്‍ ബെംഗളൂരു ടോര്‍പിഡോസിനോട് തോറ്റു. ആദ്യ സെറ്റ് നേടിയ ശേഷമാണ് തോല്‍വി പിണഞ്ഞത്. സ്‌കോര്‍: 15-13, 15-17, 9-15, 12-15. ബെംഗളൂരു വിജയക്കുതിപ്പ് തുടര്‍ന്നു. മാറ്റ് വെസ്റ്റാണ് കളിയിലെ താരം. ഇതുവരെ ഒരു മത്സരം മാത്രമാണ് കൊച്ചിക്ക് ജയിക്കാനായത്. തകര്‍പ്പന്‍ തുടക്കമായിരുന്നു കൊച്ചിയുടേത്. സി.കെ അഭിഷേകിന്റെ മിന്നുന്ന ആക്രമണ നീക്കങ്ങളാണ് കൊച്ചിക്ക് ഗുണമായത്. എന്നാല്‍ ബെംഗളൂരു വിട്ടുകൊടുത്തില്ല. സേതുവിന്റെ സൂപ്പര്‍ സെര്‍വിലൂടെ അവര്‍ തിരിച്ചെത്തി. ക്യാപ്റ്റനും സെറ്ററുമായ മാത്യു വെസ്റ്റ് സഹതാരങ്ങള്‍ക്ക് മികച്ച രീതിയില്‍ അവസരമൊരുക്കിയതോടെ കളി ബെംഗളൂരുവിന് അനുകൂലമായി. നിതിന്‍ മന്‍ഹാസാണ് ബംഗളൂരു ബ്ലോക്കര്‍മാരില്‍ തിളങ്ങിയത്. നിര്‍ണായക സൂപ്പര്‍ പോയിന്റ് സമ്മാനിച്ചത് നിതിനായിരുന്നു. ഇതിനിടെ തന്ത്രപരമായ റിവ്യൂവിലൂടെ കൊച്ചി കളി കൈവിടാതെ സൂക്ഷിച്ചു.

എറിന്‍ വര്‍ഗീസായിരുന്നു കൊച്ചിയുടെ ആയുധം. പക്ഷേ, ജോയെല്‍ ബെഞ്ചമിനും യാലെന്‍ പെന്റോസും ബെംഗളൂരുവിനായി തകര്‍പ്പന്‍ പ്രകടനം പുറത്തെടുത്തതോടെ കൊച്ചി സമ്മര്‍ദത്തിലായി. ഇതിനിടെ സെറ്റര്‍ ബയ്‌റണ്‍ കെറ്റുറാകിസ് പരിക്കേറ്റ് മടങ്ങിയത് കൊച്ചിയുടെ താളം തെറ്റിച്ചു. പിന്നെയൊരു തിരിച്ചുവരവുണ്ടായില്ല. കൊച്ചിയുടെ തളര്‍ച്ച മുതലാക്കി ടോര്‍പ്പിഡോസ് ആഞ്ഞടിച്ചു. പെന്റോസായിരുന്നു ആക്രമണകാരി. മറുവശത്ത് കൊച്ചി പിഴവുകള്‍ നിരന്തം വരുത്താനും തുടങ്ങി. ബെംഗളൂരു ആക്രമണനിരയില്‍ സേതു കൂടി ചേര്‍ന്നതോടെ കളി ഏകപക്ഷീയമായി മാറുകയായിരുന്നു. അരവിന്ദിനെ കളത്തിലെത്തിച്ച് കൊച്ചി തിരിച്ചടിക്കാന്‍ ശ്രമിച്ചു. പക്ഷേ, ആ ശ്രമങ്ങള്‍ക്കൊന്നും വലിയ ആയുസുണ്ടായില്ല. ബെംഗളൂരു കൊച്ചി പ്രതിരോധത്തെ കാര്യമായി പരീക്ഷിച്ചുകൊണ്ടിരുന്നു. ഒടുവില്‍ ജോയെല്‍ ബെഞ്ചമിന്റെ കരുത്തുറ്റ സ്‌പൈക്കില്‍ ബെംഗളൂരു സീസണിലെ തുടര്‍ച്ചയായ മൂന്നാം ജയവും സ്വന്തമാക്കി. നാളെ (ഞായര്‍) രണ്ട് മത്സരങ്ങളാണ്. ആദ്യ ജയം തേടി നിലവിലെ ചാമ്പ്യന്‍മാരായ കാലിക്കറ്റ് ഹീറോസ് ഡല്‍ഹി തൂഫാന്‍സിനെ നേരിടും, വൈകിട്ട് 6.30നാണ് കളി. കഴിഞ്ഞ മൂന്ന് മത്സരത്തിലും കാലിക്കറ്റിന് തോല്‍വിയായിരുന്നു. രാത്രി 8.30ന് അഹമ്മദാബാദ് ഡിഫന്‍ഡേഴ്‌സും ഹൈദരാബാദ് ബ്ലാക്‌ഹോക്‌സും ഏറ്റുമുട്ടും.

ഹൈദരാബാദ്: ആര്‍.ആര്‍ കാബെല്‍ പ്രൈം വോളിബോള്‍ ലീഗ് നാലാം സീസണില്‍ തുടര്‍ച്ചയായ മൂന്നാംജയംകുറിച്ച് മുംബൈ മിറ്റിയോഴ്‌സിന്റെ കുതിപ്പ്. ഡല്‍ഹി തൂഫാന്‍സിനെ നേരിട്ടുള്ള സെറ്റുകളില്‍ തകര്‍ത്തു. സ്‌കോര്‍: 15-12, 15-10, 15-11. ഓം ലാഡ് വസന്ത് ആണ് കളിയിലെ താരം. മുഹമ്മദ് ജാസിമിന്റെ തകര്‍പ്പന്‍ സെര്‍വിലൂടെയായിരുന്നു ഡല്‍ഹിയുടെ തുടക്കം. എന്നാല്‍ അഭിനവ് സലാര്‍ അതിന് സൂപ്പര്‍ പോയിന്റിലൂടെ മറുപടി നല്‍കി. ഡല്‍ഹി പ്രതിരോധത്തില്‍ ശ്രദ്ധയൂന്നിയെങ്കിലും മുംബൈ ശുഭം ചൗധരിയിലൂടെ എതിര്‍കോര്‍ട്ടിലെ വിടവുകള്‍ കണ്ടെത്തി. ക്യാപ്റ്റന്‍ അമിത് ഗുലിയയുടെ സെര്‍വീസ് ഡല്‍ഹി ലിബെറോ ആനന്ദിനെ സമ്മര്‍ദത്തിലാക്കി. അതേസമയം, കാര്‍ലോസ് ബെറിയോസിന്റെ തകര്‍പ്പന്‍ സ്‌പൈക്കില്‍ ഡല്‍ഹി സൂപ്പര്‍ പോയിന്റ് നേടി. കരുത്തുറ്റ പ്രകടനത്തിനിടയിലും ഡല്‍ഹിക്ക് പക്ഷേ, മികച്ച േഫാമിലുള്ള മുംബൈയെ പരീക്ഷിക്കാനായില്ല.

സഖ്‌ലെയ്ന്‍ താരിഖ് ഡല്‍ഹിയെ മുന്നില്‍നിന്ന് നയിച്ച് സഹതാരങ്ങള്‍ക്ക് ഊര്‍ജം പകര്‍ന്നു. വിജയകരമായ റിവ്യൂവിലൂടെ അവര്‍ ആത്മവിശ്വാസം നേടുകയും ചെയ്തു. പക്ഷേ, ഹെസ്യൂസ് ചൗറിയോയുടെ കരുത്തുറ്റ ഷോട്ട് അഭിനവ് നയിക്കുന്ന മൂന്നംഗ ബ്ലോക്കര്‍മാര്‍ തടഞ്ഞതോടെ മോഹം പൊലിഞ്ഞു. അഭിനവിന്റെ മറ്റൊരു സെര്‍വില്‍ സൂപ്പര്‍ പോയിന്റ് പിടിച്ച് മുംബൈ കളിയുടെ നിയന്ത്രണം പൂര്‍ണമായും നേടി. സെറ്റര്‍ ഓം ലാഡ് വസന്തിന്റെ മികച്ച പാസുകള്‍ കാര്യങ്ങള്‍ എളുപ്പമാക്കി. കളി കൈയില്‍നിന്ന് പോകുന്നതിനിടെ ഡല്‍ഹി ചൗറിയോയുടെ കരുത്തില്‍ കളം പിടിക്കാന്‍ ശ്രമിച്ചു. പക്ഷേ, തകര്‍പ്പന്‍ പ്രത്യാക്രമണമായിരുന്നു മുംബൈയുടെ മറുപടി. വിദേശ താരങ്ങളായ മതിയാസ് ലോഫ്റ്റന്‍സെസും പീറ്റര്‍ അല്‍സ്റ്റാഡ് ഒസ്റ്റിവിക്കും മികച്ച ബ്ലോക്കുകളിലൂടെ മുംബൈയുടെ തുടര്‍ച്ചയായ മൂന്നാം ജയം പൂര്‍ത്തിയാക്കി. ഇന്ന് വൈകിട്ട് 6.30ന് ഗോവ ഗാര്‍ഡിയന്‍സും ചെന്നൈ ബ്ലിറ്റ്‌സും ഏറ്റുമുട്ടും.

ഹൈദരാബാദ്: ആര്‍.ആര്‍ കാബെല്‍ പ്രൈം വോളിബോള്‍ ലീഗ് പവേര്‍ഡ് ബൈ സ്‌കാപ്പിയയുടെ നാലാം സീസണില്‍ അഹമ്മദാബാദ്‌ ഡിഫൻഡേഴ്‌സിനെതിരെ തകർപ്പൻ ജയംകുറിച്ച്‌ ഗോവ ഗാർഡിയൻസ്‌. അഞ്ച്‌ സെറ്റ്‌ ത്രില്ലറിലാണ്‌ ജയം. സ്‌കോർ: 13–15, 15–11, 9–15, 18–16, 19–17. ഗോവയുടെ ആദ്യജയമാണ്‌. രോഹിത്‌ യാദവാണ്‌ കളിയിലെ താരം.

അത്യന്തം ആവേശം നിറഞ്ഞ മത്സരമാണ്‌ കണ്ടത്‌. ഒടുവിൽ അവസാനനിമിഷംകുറിച്ച പോയിന്റിൽ ഗോവ നേടി. ആദ്യ നിമിഷങ്ങളിൽ നാടകീയത നിറഞ്ഞു. റിവ്യൂ വിളികളും സൂപ്പർ സെർവുകളും യഥേഷ്‌ടം കണ്ട കളിയിൽ ഇരു ടീമുകളും ലീഡ്‌ നേടാൻ ആഞ്ഞുശ്രമിക്കുകയായിരുന്നു. അംഗമുത്തു, ഷോൺ ടി, ബട്ടുർ ബട്‌സൂറി, ക്യാപ്‌റ്റനും സെറ്ററുമായ മുത്തുസ്വാമി അപ്പാവു എന്നിവർ ആക്രമണങ്ങളിൽ നിറഞ്ഞു.

ഗോവ ക്യാപ്റ്റൻ ചിരാഗ്‌ യാദവ്‌ വിദേശ താരങ്ങളായ ജെഫറി മെൻസെൽ, നതാനിയേൽ ഡിക്കൻസൺ എന്നിവരുമായി ചേർന്ന്‌ ഗോവയുടെ പ്രത്യാക്രമണം നെയ്‌തു. അഹമ്മദബാദിന്റെ കരുത്തിനെ പ്രതിരോധിക്കാൻ ഗോവൻ പ്രതിരോധത്തിൽ പ്രിൻസ്‌ ഉറച്ചുനിന്നു. ഇരു ടീമുകളും പരസ്‌പരം വാശിയോടെ പോരാടി.
ബട്‌സൂറിയുടെ ബാലിസ്‌റ്റിക്‌ മിസൈലുകൾ ഇടതുവശത്തുനിന്ന്‌ പതിച്ചു. രോഹിത്‌ ഗോവയുടെ കൃത്യതയുള്ള സെറ്ററായി. ഡിക്കൻസനെ അഭിനവ്‌ ബ്ലോക്ക്‌ ചെയ്‌തു. പക്ഷേ, മെൻസെൽ ഗോവൻനിരയിൽനിന്ന്‌ അഹമ്മാബാദിന്റെ ഒഴിഞ്ഞ ഇടങ്ങൾ നോക്കി ആക്രമിച്ചു. തുടർച്ചയായ രണ്ട്‌ പോയിന്റുകൾ നേടി മത്സരം അഞ്ചാം സെറ്റിലേക്ക്‌ നീട്ടി.

അഹമ്മദാബാദ്‌ നിരയിലേക്ക്‌ കരുത്തുറ്റ സൂപ്പർ സെർവ്‌ തൊടുത്ത ബട്‌സൂറി കളിഗതി അഹമ്മാബാദ്‌ നിരയിലേക്ക്‌ മാറ്റി. എന്നാൽ അവസാന സൂപ്പർ പോയിന്റിലൂടെ ഗോവ അന്തരം ചെറുതാക്കി. പിന്നാലെ ഡിക്കൻസെന്റെ നിരന്തരമുള്ള ആക്രമണം കണ്ടു. ഒടുവിൽ മെൻസെലിന്റെ സ്‌പൈക്കിലൂടെ ഗോവ അവിസ്‌മരണീയ ജയം കുറിക്കുകയായിരുന്നു.