Tag: Pjanic

മധ്യനിര താരം മിറാലം പ്യാനിച്ച് ബാഴ്‌സലോണ വിട്ടു. യുഎഇയിലെ ഷാർജ എഫ്സി സമർപ്പിച്ച ഓഫർ താരം അംഗീകരിക്കുകയായിരുന്നു. മുപ്പത്തിരണ്ടുകാരനായ താരം രണ്ടു വർഷത്തെ കരാറിൽ ആണ് കൂടുമാറ്റത്തിന് സമ്മതം മൂളിയത്. കരാർ പിന്നീട് ഒരു വർഷത്തേക്ക് കൂടി നീട്ടാനും സാധിക്കും. താരത്തിന് രണ്ടു വർഷം കൂടി ബാഴ്‌സലോണയിൽ കരാർ ബാക്കിയുണ്ട്. ഈ കാലയളവിലെ കരാർ തുക താരം വേണ്ടെന്ന് വെച്ചിട്ടുണ്ട്. കൈമാറ്റം എളുപ്പമാക്കാൻ ആയിരുന്നു ഈ നീക്കം.

അവസരങ്ങൾ കുറവാകും എന്നതിനാൽ താരത്തിന് ഈ കൂടുമാറ്റം നല്ലൊരു നീക്കമാണ്. ഗവി അടക്കമുള്ളവരുടെ കരാർ പുതുക്കാൻ ഇത് ബാഴ്‌സയെ സഹായിക്കുകയും ചെയ്യും. അതേ സമയം ഡിഫൻസിവ് മിഡ്ഫീൽഡർ സ്ഥാനത്ത് അനുഭവസമ്പത്തുള്ള താരങ്ങളുടെ എണ്ണം ബാഴ്‌സയിൽ സെർജിയോ ബസ്ക്വറ്റ്‌സിൽ ഒതുങ്ങും.

പ്യാനിച്ച് പ്രീ സീസണിൽ മികച്ച പ്രകടനം കാഴ്ച്ച വെച്ച് ടീമിൽ തുടരുന്നതും കൂടി കണക്കിൽ എടുത്താണ് മറ്റൊരു താരമായ നിക്കോ ലോണിൽ പോകാൻ തയ്യാറായത്. ബസ്ക്വറ്റ്‌സ് ഇല്ലെങ്കിൽ ഫ്രാങ്കി ഡിയോങ് തന്നെ ആവും സാവിയുടെ അടുത്ത ലിസ്റ്റിൽ ഈ സ്ഥാനത്തെക്കുള്ള അടുത്ത താരം. അതേ സമയം ടീമിൽ എത്തിയ ശേഷം അവസരം കിട്ടാതെ ഉഴറിയ താരത്തിന് ഈ കൈമാറ്റം ആശ്വാസമേകും.

ബാഴ്സലോണയുടെ മധ്യനിര താരം മിറാലം പ്യാനിച്ചിന് യുഎഇയിൽ നിന്നും ഓഫർ. യുഎഇ പ്രോ ലീഗ് ടീമായ ഷാർജ എഫ്സിയാണ് താരത്തിന് വേണ്ടി സമീപിച്ചിരിക്കുന്നതെന്ന് ഫാബ്രിസിയോ റോമാനോ റിപ്പോർട്ട് ചെയ്യുന്നു. മൂന്ന് വർഷത്തെ കരാർ ആണ് താരത്തിന് വേണ്ടി ടീം മുന്നോട്ട് വെച്ചിരിക്കുന്നത്. താരം ഇത് അംഗീകരിക്കുമോ എന്ന കാര്യം ഉറപ്പില്ല.

പ്രീ സീസണിൽ തരക്കേടില്ലാത്ത പ്രകടനം കാഴ്ച്ച വെച്ചതോടെ സാവി പ്യാനിച്ചിന് ടീമിൽ അവസരം നൽകിയേക്കും എന്ന സൂചനയുണ്ടായിരുന്നു. ഇതിന് പിറകെ മറ്റൊരു ഡിഫെൻസിവ് മിഡ്ഫീൽഡർ ആയ നിക്കോ ടീം വിടുകയും ചെയ്തതോടെ ടീമിൽ ബസ്ക്വറ്റ്‌സ് അല്ലാതെ ഡിഫെൻസിവ് മിഡിൽ കളിക്കാൻ പ്രാപ്തിയുള്ള മറ്റൊരു താരമാണ് പ്യാനിച്ച്. എന്നാൽ ലീഗിൽ ഇതുവരെ താരത്തിന് അവസരം ലഭിച്ചിട്ടില്ല. ഓഫർ വന്നെങ്കിലും താരത്തിന്റെ തീരുമാനത്തിന് കാത്തിരിക്കുകയാണ് ബാഴ്‌സലോണ. ടീമിൽ തുടരുകയാണെങ്കിൽ ചുരുങ്ങിയ അവസരം മാത്രമേ താരത്തിന് ലഭിക്കൂ എന്നുള്ളത് ഉറപ്പാണ്.