Tag: Malappuram FC

മലപ്പുറം: താജിക്കിസ്ഥാൻ മുന്നേറ്റതാരം കമ്രോൺ തുർസനോവിനെ സൈൻ ചെയ്ത് മലപ്പുറം എഫ്‌.സി. ഐ-ലീഗിൽ മികച്ച പ്രകടനങ്ങൾ കാഴ്ചവെച്ചിട്ടുള്ള ഈ താരത്തിന്റെ വരവ് ക്ലബിന്റെ ആക്രമണ നിരയ്ക്ക് കൂടുതൽ കരുത്തേകുമെന്നാണ് പ്രതീക്ഷ. ഇന്ത്യൻ ഫുട്ബോളിൽ വളരെയധികം പരിചയ സമ്പത്തുള്ള കളിക്കാരൻ കൂടിയാണ് തുർസനോവ്. താരത്തിന്റെ വേഗതയും ഫിനീഷിംഗും സെറ്റ്പീസുകൾ എടുക്കുന്നതിലെ മികവും ടീമിന് ഗുണകരമാവും.

2019-ൽ ഇന്ത്യയിൽ കളിക്കാൻ എത്തിയ തുർസനോവ് ആദ്യ സീസണിൽ തന്നെ മോഹൻ ബഗാൻറെ കൂടെ ഐ-ലീഗ് കിരീടം നേടുകയും ആരാധകരുടെ പ്രിയതാരമായി മാറുകയും ചെയ്തു. തുടർന്ന് ട്രാവു എഫ്.സി, രാജസ്ഥാൻ യുണൈറ്റഡ്, ചർച്ചിൽ ബ്രദേഴ്സ്,ഗോകുലം കേരള എന്നീ ടീമുകൾക്ക് വേണ്ടിയും മികച്ച പ്രകടനം കാഴ്ചവെച്ചിരുന്നു. 2023-24 സീസണിൽ ഗോകുലം കേരളക്കായി 6 ഗോളുകളും 2 അസിസ്റ്റും താരം നേടി. ഐ-ലീഗിൽ ഏറ്റവും വേഗത്തിൽ ഗോൾ നേടിയ കളിക്കാരൻ കൂടിയാണ് തുർസനോവ്. 2021ൽ ട്രാവു എഫ്സിക്കു വേണ്ടി റിയൽ കശ്മീരിനെതിരെ വെറും 9 സെക്കൻഡിലാണ് അദ്ദേഹം സ്കോർ ചെയ്തത്.

എഫ്‌സി റീഗർ ടഡാസ്, എഫ്സി ഇസ്തിക്‌ലോൽ, എഫ്.കെ ഖുജാന്ദ്,റവ്ഷാൻ കുലോബ് തുടങ്ങിയ താജികിസ്ഥാൻ ടീമുകൾക്കും വേണ്ടിയും പന്ത് തട്ടിയിട്ടുണ്ട്. ഇന്തോനേഷ്യൻ ക്ലബായ ഡെജൻ എഫ്‌സിയിലും താരം കളിച്ചിട്ടുണ്ട്.സൂപ്പർ ലീഗ് കേരളയുടെ രണ്ടാം സീസണിനായി തയ്യാറെടുക്കുന്ന മലപ്പുറം എഫ്‌.സി മികച്ച സ്ക്വാഡിനെ തന്നെയാണ് ഒരുക്കുന്നത്.

മലപ്പുറം: സൂപ്പർ ലീഗ് കേരളയുടെ രണ്ടാം സീസണിൽ മലപ്പുറം ഫുട്ബോൾ ക്ലബിനായി പന്ത് തട്ടാൻ അർജന്റീന വംശജനായ ഫാകുണ്ടോ ബല്ലാർഡോയും.മധ്യനിര കൂടുതൽ ശക്തിപ്പെടുത്തുന്നതിനാണ് അർജന്റീനിയൻ അറ്റാക്കിംഗ് മിഡ്ഫീൽഡറെ ടീമിലെത്തിച്ചിരിക്കുന്നത്. സെൻട്രൽ മിഡ്ഫീൽഡിലും അറ്റാക്കിംഗിലും ഒരുപോലെ കളിക്കാൻ കഴിയുന്ന താരമാണ് ഫാകുണ്ടോ. വെറും 29 വയസ്സ് മാത്രമാണ് താരത്തിന്റെ പ്രായം.

അർജന്റീനിയൻ ആണെങ്കിലും താരം പ്രൊഫഷണൽ ഫുട്ബോളിൽ ഇതുവരെ കളിച്ചത് സ്പാനിഷ് ടീമുകൾക്കു വേണ്ടി മാത്രമാണ്. ഫാകുണ്ടോ സ്പാനിഷ് പൗരത്വവും നേടിയിട്ടുണ്ട്. സ്പെയിനു പുറത്ത് ഇതാദ്യമായാണ് താരം കളിക്കാനെത്തുന്നത്. മികച്ച അനുഭവ സമ്പത്തും നല്ല ഉയരവും ഉള്ളത് കൊണ്ട് തന്നെ എംഎഫ്സി ടീമിന് ഈ സൈനിംഗ് ഒരുപാട് ഗുണം ചെയ്യും.

സ്പെയിനിലെ മൂന്നാം ഡിവിഷൻ ക്ലബായ സിഡി കലഹോറയിൽ നിന്നാണ് ഫാകുണ്ടോ മലപ്പുറം എഫ്.സിയിലേക്കെത്തുന്നത്. കലഹോറയ്ക്ക് വേണ്ടി കഴിഞ്ഞ സീസണിൽ 31 മത്സരങ്ങളിൽ നിന്നും 4 ഗോളും 2 അസിസ്റ്റും നേടിയിട്ടുണ്ട്. എസ്ഡി ഫോർമെന്റെറ, അത്‌ലറ്റിക്കോ സാൻലുക്വിനോ സിഎഫ്, ഹാരോ ഡിപോർട്ടീവോ,ഔറൻസ് സിഎഫ്, എസ്ഡി ടാറാസോന, ഡിപോർട്ടീവോ അലാവസ് ബി തുടങ്ങിയ സ്പാനിഷ് ക്ലബുകൾക്കായി 134 -ഓളം മത്സരങ്ങളിൽ ബൂട്ടണിഞ്ഞിട്ടുണ്ട്. കഴിഞ്ഞ തവണ സെമി കാണാതെ പോയ മലപ്പുറം ഇത്തവണ കിരീടം നേടുക എന്ന ലക്ഷ്യത്തോടെയാണ് ഇറങ്ങുന്നത്.

മലപ്പുറം: സൂപ്പർ ലീഗ് കേരളയുടെ രണ്ടാം സീസണിന് മുന്നോടിയായി സ്പാനിഷ് സെന്റർബാക്ക് സെർജിയോ ഗോൺസാലസിനെ ടീമിലെത്തിച്ച് മലപ്പുറം എഫ്സി. വെറും 24 വയസ്സു മാത്രമുള്ള ഈ പ്രതിരോധ താരം നിരവധി സ്പാനിഷ് ക്ലബുകൾക്കായി പന്ത് തട്ടിയിട്ടുണ്ട്. സെന്റർബാക്ക് പൊസിഷനിൽ മികച്ച പ്രകടനം കാഴ്ച്ചവെക്കുന്ന താരം ഡിഫൻസീവ് മിഡ്ഫീൽഡിലും കളിക്കാൻ കഴിയുന്ന താരമാണ്.

സ്പെയിന് പുറത്ത് വേറൊരു ലീഗിൽ ഇതാദ്യമായാണ് ഗോൺസാലസ് കളിക്കാൻ വരുന്നത്. സ്പെയിനിലെ നാലാം ഡിവിഷൻ ക്ലബായ സീഡി അത്‌ലറ്റികോ പാസോയിൽ നിന്നാണ് താരം മലപ്പുറം എഫ്സിയിലേക്കെത്തുന്നത്. പത്തോളം മത്സരങ്ങളിൽ അത്‌ലറ്റികോ പാസോക്കായി കളത്തിലിറങ്ങിയിട്ടുണ്ട്.

റിയൽ സോസീഡാഡിന്റെ യുത്ത് ടീമിലൂടെയാണ് താരം പ്രൊഫഷണൽ ഫുട്ബോളിലേക്കെത്തുന്നത്. തുടർന്ന് സറൗട്ട്സ് കെഇ,സിഡി നുമാൻസിയ, ടൊലൗസ സിഎഫ്, പസായിയ കെഇ, സിഡി സിഎസ, സിഡി ടോളിഡോ തുടങ്ങിയ സ്പാനിഷ് ക്ലബുകൾക്കു വേണ്ടിയും കളിച്ചു. മലപ്പുറം എഫ്സിയുടേത് ഒരു സ്പാനിഷ് പരിശീലകനായത് കൊണ്ട് തന്നെ ഗോൺസാലസിന് ടീമിന്റെ തന്ത്രങ്ങളുമായി പെട്ടന്ന് പൊരുത്തപെടാൻ കഴിയും.

മലപ്പുറം: സൂപ്പർ ലീഗ് രണ്ടാം സീസണിൽ ടീമിന്റെ ഗോൾവല കാക്കാൻ മുഹമ്മദ് അസ്ഹറിനെ ടീമിലെത്തിച്ച് മലപ്പുറം എഫ്.സി, നിലവിൽ കേരളാ പോലീസ് ടീമിൻറെ ഗോൾകീപ്പറാണ് അസ്ഹർ. സന്തോഷ് ട്രോഫിയിലും നാഷണൽ ഗെയിംസിലുമടക്കം നിരവധി ടൂർണ്ണമെൻറുകളിൽ കേരളത്തിന് വേണ്ടി ഗ്ലൗസണിഞ്ഞിട്ടുണ്ട്. മലപ്പുറം പെരിന്തൽമണ്ണ സ്വദേശിയാണ് 28-കാരനായ ഈ താരം.ഗോൾപോസ്റ്റിന് മുന്നിലെ തന്റെ സ്ഥിരതയാർന്ന പ്രകടനങ്ങളും മികച്ച സേവുകളും തന്നെയാണ് അസ്ഹറിനെ വേറിട്ടു നിർത്തുന്നത്.

മലപ്പുറം ജില്ലക്ക് വേണ്ടി സീനിയർ ചാമ്പ്യൻഷിപ്പിൽ 5 തവണ കളിച്ചിട്ടുണ്ട് .കൂടാതെ കാലിക്കറ്റ് യൂണിവേഴ്സിറ്റിക്ക് വേണ്ടിയും താരം ബൂട്ട് കെട്ടിയിട്ടുണ്ട്.ഇക്കഴിഞ്ഞ 78മത് സന്തോഷ് ട്രോഫിയിൽ റണ്ണർഅപ്പായ കേരളാ ടീമിലെ അംഗം കൂടിയാണ് അസ്ഹർ, ഇതിന് മുൻപ് 2019ലും 2023ലും കേരള സന്തോഷ് ട്രോഫി ടീമിലിടം നേടിയിട്ടുണ്ട്.2023 നാഷണൽ ഗെയിംസിൽ വെങ്കലം നേടിയ കേരള ടീം അംഗം കൂടിയാണ്.

കേരള പ്രീമിയർ ലീഗിൽ കഴിഞ്ഞ രണ്ട് സീസണിലും തുടർച്ചയായി മികച്ച ഗോൾകീപ്പർക്കുള്ള പുരസ്കാരം നേടിയത് അസ്ഹറായിരുന്നു. 2017ൽ ഗോകുലം കേരളയിലൂടെയാണ് താരം പ്രൊഫഷണൽ ഫുട്ബോളിലേക്കെത്തുന്നത്. അവിടന്ന് കേരളാ പോലീസ് ടീമിലേക്ക് മാറുകയായിരുന്നു. ഇക്കഴിഞ്ഞ കെ.പി.എല്ലിൽ റണ്ണർഅപ്പായത് കേരളാ പോലീസാണ്. തന്റെ മികച്ച പ്രകടനങ്ങൾ ഇനി എം.എഫ്.സിക്കു വേണ്ടിയും തുടരാനാകുമെന്നാണ് താരത്തിൻറെ പ്രതീക്ഷ.

മലപ്പുറം:എസ്.എൽ.കെ രണ്ടാം സീസണിൽ മലപ്പുറം എഫ്.സിക്കായി ബൂട്ടണിയാൻ കേരള പോലീസിൻറെ സൂപ്പർതാരം സഞ്ജു ഗണേഷും. പ്രതിരോധ നിരയിൽ മികച്ച അനുഭവ സമ്പത്തുള്ള കളിക്കാരനാണ് സഞ്ജു. എംഎഫ്സിയുടെ പ്രതിരോധ നിരയിലേക്ക് വലിയ കരുത്ത് പകരുന്നത് തന്നെയാണ് ഈ സൈനിംഗ്. എറണാകുളം ആലുവ സ്വദേശിയാണ് 30കാരനായ ഈ താരം.

കഴിഞ്ഞ 78മത് സന്തോഷ് ട്രോഫിയിൽ റണ്ണർ-അപ്പായ കേരളാ ടീമിൻറെ നായകനായിരുന്നു സഞ്ജു ഗണേഷ്, കൂടാതെ 2022ൽ സന്തോഷ് ട്രോഫി കിരീടം നേടിയ ടീമിലും താരമുണ്ടായിരുന്നു. കേരള ടീമിൻറെ കൂടെ 2023 നാഷണൽ ഗെയിംസിൽ വെള്ളിയും 2024 നാഷണൽ ഗെയിംസിൽ വെങ്കലവും നേടിയിട്ടുണ്ട്. കേരളാ ഫുട്ബോൾ അസോസിയേഷൻറെ 2024-25 വർഷത്തെ മികച്ച കളിക്കാരനുള്ള അവാർഡിന് അർഹനായത് സഞ്ജുവായിരുന്നു.

2018 -ൽ ഗോകുലം കേരളയിലൂടെയാണ് സഞ്ജു ഫ്രൊഫഷണൽ ഫുട്ബോളിൽ കരിയർ ആരംഭിക്കുന്നത്. 2019ൽ ഗോകുലത്തിൻറെ കൂടെ ഡ്യൂറൻഡ് കപ്പ് ചാമ്പ്യനാവുകയും ചെയ്തിരുന്നു. അതിന് ശേഷം ഡിപാർട്ട്മെൻറ് ടീമായ കേരളാ പോലീസിലേക്ക് ചേക്കേറുകയായിരുന്നു. ഇക്കഴിഞ്ഞ കേരള പ്രീമിയർ ലീഗ് റണ്ണർ-അപ്പായത് സഞ്ജുവിൻറെ നേതൃത്വത്തിലുള്ള പോലീസ് ഫുട്ബോൾ ടീമായിരുന്നു. വരാൻ പോകുന്ന സീസണിലേക്ക് ഇത് വരെ മികച്ച കളിക്കാരെ തന്നെയാണ് മലപ്പുറം എഫ്.സി സൈൻ ചെയ്തിട്ടുള്ളത്. അതുകൊണ്ടു തന്നെ വലിയ പ്രതീക്ഷകളോടെയാണ് ആരാധകർ ഈ സീസണിനായി കാത്തിരിക്കുന്നത്.

ഹൈദരാബാദ് എഫ്സിയുടെ മലയാളി യുവതാരം അഭിജിത്ത് പി.എ ഇനി മലപ്പുറം എഫ്‌.സിയുടെ ജേഴ്സിയണിയും. തൃശൂർ കൂർക്കഞ്ചേരി സ്വദേശിയാണ് 22കാരനായ ഈ മധ്യനിര താരം. കേരളത്തിന് വേണ്ടി ജൂനിയർ നാഷണൽ ചാമ്പ്യൻഷിപ്പിൽ തിളങ്ങിയത് വഴിയാണ് 2023ൽ ഹൈദരാബാദ് എഫ്‌.സിയുടെ റിസർവ് ടീമിലേക്ക് അഭിജിത്തിനെ സൈൻ ചെയ്തത്. തുടർന്ന് താരം ക്ലബിന്റെ ഏറ്റവും പ്രതീക്ഷയുള്ള യുവ മിഡ്ഫീൽഡറായി മാറുകയും ചെയ്തു.

ഡെവലപ്മെന്റ് ലീഗിൽ ടീമിൻറെ ടോപ് സ്‌കോററായ അഭിജിത്ത് ഐ-ലീഗ് സെക്കൻഡ് ഡിവിഷനിലും റിസർവ് ടീമിന് വേണ്ടി ശ്രദ്ധേയമായ പ്രകടനം നടത്തിയിരുന്നു. ഈ പ്രകടനത്തെ തുടർന്ന് താരത്തെ ഹൈദരാബാദ് എഫ്സിയുടെ സീനിയർ ടീമിലേക്ക് പ്രമോട്ട് ചെയ്യുകയായിരുന്നു.സൂപ്പർ കപ്പിലൂടെയാണ് അഭിജിത്ത് സീനിയർ ടീമിനായി അരങ്ങേറ്റം കുറിച്ചത്, പിന്നീട് 2024ൽ ഹൈദരാബാദ് എഫ്.സിക്ക് വേണ്ടി ഐ.എസ്.എല്ലിൽ അരങ്ങേറ്റം കുറിക്കുകയും ചെയ്തു. തുടർന്നുള്ള മത്സരങ്ങളിൽ മധ്യനിരയിൽ തുടർച്ചയായി അവസരം ലഭിച്ചു. ഹൈദരാബാദ് എഫ്.സിക്ക് വേണ്ടി 24ഓളം മത്സരങ്ങളിൽ കളത്തിലിറങ്ങിയിട്ടുണ്ട്.

മധ്യനിരയിൽ നിന്ന് മുന്നേറ്റത്തിനും പ്രതിരോധത്തിനും ഒരു പോലെ പിന്തുണ നൽകാൻ കെൽപ്പുള്ള താരമാണ് അഭിജിത്ത്. കെ.പി.എല്ലിൽ ഗോൾഡൻ ത്രെഡ്സ്, എഫ്സി കേരള തുടങ്ങിയ ടീമുകൾക്ക് വേണ്ടി ബൂട്ട് കെട്ടിയിട്ടുണ്ട്.തന്റെ മികച്ച പ്രകടനങ്ങൾ ഇനി മലപ്പുറത്തിന്റെ കുപ്പായത്തിലും തുടരാനാകുമെന്നാണ് താരത്തിൻറെ പ്രതീക്ഷ.