ഫൗൾ കളിക്കുന്ന സ്പോർട്സ് അധികാരികൾ

Picsart 23 01 20 15 03 20 136

രാജ്യ തലസ്ഥാനമായ ഡൽഹിയിലെ തണുപ്പത്ത്, ഒരു കൂട്ടം അത്‌ലറ്റുകൾ സമരത്തിലാണ്. ഇന്ത്യക്ക് വേണ്ടി ലോക കായിക മേളകളിൽ ഒട്ടനവധി തവണ മെഡൽ വാങ്ങിയവരും, ദേശീയ ടീമിൽ വളർന്നു വരുന്നവരുമായ ഗുസ്തി താരങ്ങളാണ് തങ്ങൾക്ക് നേരെ അധികാരികളിൽ നിന്നും കോച്ചിങ് സ്റ്റാഫിൽ നിന്നും ഉണ്ടായ ലൈംഗിക ആക്രമണ ഉൾപ്പടെയുള്ള പരാതികൾ ഉയർത്തി ജന്ദർ മന്ദറിൽ നാല് ദിവസമായി സമരത്തിൽ പങ്കെടുക്കുന്നത്.

Picsart 23 01 20 15 03 45 993

സർക്കാരിന്റെ മൂക്കിന് താഴെ നടക്കുന്ന ഈ സമരത്തെ ആദ്യ ദിവസങ്ങളിൽ അവർ കണ്ടില്ലെന്നു നടിച്ചില്ലെങ്കിലും, പിന്നീട് പ്രസ്താവനകൾ വന്നു. പക്ഷെ നടപടികൾ മാത്രം ഉണ്ടായില്ല. കാരണം, ഗുസ്തി ഫെഡറേഷന്റെ തലപ്പത്തു ഒരു ഭരണകക്ഷി എംപിയാണുള്ളത്. അയാൾ ഇതിന് മുൻപ് പരസ്യമായി ഒരു ഗുസ്തി താരത്തെ ആക്രമിച്ചിട്ടും നടപടിയുണ്ടായിട്ടില്ല എന്ന് ഓർക്കണം.

ഇന്ത്യൻ സ്പോർട്സ് നടത്തിപ്പിന്റെ ഒരു നേർക്കാഴ്ചയാണ് കഴിഞ്ഞ നാല് ദിവസത്തെ സംഭവങ്ങൾ. ഈ വാർത്തകൾ കണ്ടിട്ട് സാധാരണ ജനങ്ങൾക്ക് ഒരു അത്ഭുതവും തോന്നുന്നില്ല എന്ന ഒരൊറ്റ കാര്യം മതി നമ്മുടെ രാജ്യത്ത് എന്ത് കൊണ്ട് സ്പോർട്സ് രംഗത്ത് വലിയ മുന്നേറ്റങ്ങൾ ഉണ്ടാകുന്നില്ല എന്ന് മനസ്സിലാക്കാൻ. പീഡന പരാതികൾ, ജീവഹാനി ഉയർത്തിയുള്ള ഭീഷണികൾ ഒക്കെ മാധ്യമങ്ങളിൽ വാർത്തയായിട്ടും, അധികാരികൾ ഒരാളെ പോലും അന്വേഷണവിധേയമായി പോലും മാറ്റി നിറുത്താൻ മെനക്കെട്ടിട്ടില്ല. ഈ സമരം താനേ അടങ്ങിക്കോളും എന്ന ചിന്തയിലാണ് സർക്കാർ. എന്നാൽ നാലാം നാൾ തങ്ങളെ കണ്ട പത്രക്കാരോട് അത്‌ലറ്റുകൾ പറഞ്ഞത്, തങ്ങൾ ഒരടി പോലും പിന്നോട്ടില്ല എന്നാണ്.

Picsart 23 01 20 15 03 32 736

എന്ത് കൊണ്ടാണ് സ്പോർട്സ് രംഗത്തെ ഭരണാധികാരികൾ രാജ്യത്തിന് വേണ്ടി ജീവിതം ഉഴിഞ്ഞു വയ്ക്കുന്ന ഈ ചെറുപ്പക്കാരോട് കാലാകാലങ്ങളായി ഇത്തരത്തിൽ പെരുമാറുന്നത്? അത്‌ലറ്റുകളെ അടിമകളെ പോലെ കണ്ടു, തങ്ങളുടെ ഔദാര്യത്തിൽ കഴിയുന്നവരായി കണക്കാക്കി, മനുഷ്യാവകാശങ്ങൾ ലംഘിച്ചു നടത്തുന്ന ഈ സ്പോർട്സ് അഡ്മിനിസ്ട്രേഷൻ നിർത്തലാക്കേണ്ട കാലം അതിക്രമിച്ചിരിക്കുന്നു. ഈ മേഖലയിൽ ഭരണ സംവിധാനത്തിന് ശക്തമായ ചട്ടക്കൂടുകൾ ഉണ്ടാക്കി, പരാതി പരിഹാര സെല്ലുകൾ എല്ലാ കായിക മേഖലയിലും കൊണ്ട് വരേണ്ടത് അത്യാവശ്യമാണ്. ഇതിനു വേണ്ടി വന്നാൽ റിട്ടയേർഡ് ജഡ്ജിമാരെ തന്നെ നിയമിക്കണം. സ്പോർട്സ് മേഖലയിൽ സുപ്രീം കോടതി നേരത്തെ ചൂണ്ടിക്കാട്ടിയ പോലെ നിശ്ചിത കാലത്തേക്ക് മാത്രമായി അധികാരികളെ നിയമിക്കുക. നമ്മുടെ യുവതലമുറ ലോക നിലവാരത്തിൽ പ്രകടനം കാഴ്ചവയ്ക്കാൻ കഴിവുള്ളവരാണ്, പക്ഷെ അതിനു അവരെ അതിൽ നിന്നും തടയുന്നത് അധികാര വർഗ്ഗം മാത്രമാണ്. ഇത് മാറേണ്ടിയിരിക്കുന്നു. ഗുസ്തി താരങ്ങളുടെ ഈ സമരം അവരുടെ മാത്രമല്ല, രാജ്യത്തെ എല്ലാ സ്പോർട്സ് മേഖലയിലും ഒരു പൊളിച്ചെഴുത്തിന് തുടക്കമിടട്ടെ എന്ന് നമുക്ക് ആശിക്കാം.