ചെന്നൈ: റുപേ പ്രൈം വോളിബോൾ ലീഗ് പവേർഡ് ബൈ എ23ൽ കാലിക്കറ്റ് ഹീറോസ് ഒന്നാംസ്ഥാനക്കാരായി ഫൈനലിൽ. സൂപ്പർ 5ൽ ഡൽഹി തൂഫാൻസിനെ മുംബൈ മിറ്റിയോഴ്സ് കീഴടക്കിയതോടെ കാലിക്കറ്റ് മുന്നേറുകയായിരുന്നു. മുംബൈ പ്ലേ ഓഫ് കാണാതെ മടങ്ങി. ചെന്നൈ ജവഹർലാൽ നെഹ്റു ഇൻഡോർ സ്റ്റേഡിയത്തിൽ നടന്ന സൂപ്പർ ഫൈവിലെ അവസാന മത്സരങ്ങളിലൊന്നിൽ ഡൽഹി തൂഫാൻസിനെ നാല് സെറ്റ് പോരാട്ടത്തിലാണ് മുംബൈ കീഴടക്കിയത്. സ്കോർ: (15–11, 12–15, 15–12, 17–15). ഷമീം ആണ് കളിയിലെ താരം.
ഇതോടെ സൂപ്പർ ഫൈവിൽ ഒരു മത്സരം ശേഷിക്കെയാണ് കാലിക്കറ്റ് ഫൈനൽ ഉറപ്പിച്ചത്. മുംബൈയോട് തോറ്റെങ്കിലും ഡൽഹി എലിമിനേറ്റർ ഉറപ്പാക്കി. അഞ്ച് ടീമുകളിൽ ആദ്യ മൂന്ന് ടീമുകൾക്കാണ് യോഗ്യത. ചൊവ്വാഴ്ചയാണ് എലിമിനേറ്റർ മത്സരം. ഡൽഹി തൂഫാൻസ് മൂന്നാം സ്ഥാനക്കാരെ നേരിടും.
