ഇന്ത്യൻ ബാഡ്മിന്റണിലെ വിപ്ലവതാരം സൈന നെഹ്വാൾ പ്രൊഫഷണൽ ബാഡ്മിന്റണിൽ നിന്ന് ഔദ്യോഗികമായി വിരമിക്കൽ പ്രഖ്യാപിച്ചു. കഴിഞ്ഞ രണ്ട് വർഷമായി വിട്ടുമാറാത്ത കാൽമുട്ടിലെ പരിക്കുകളുമായി പോരാടുകയായിരുന്നു 35-കാരിയായ ഈ ഒളിമ്പിക് വെങ്കല മെഡൽ ജേതാവ്.
കാൽമുട്ടിലെ പരിക്ക് കഠിനമായ പരിശീലനത്തിന് തടസ്സമായതോടെയാണ് വിരമിക്കൽ തീരുമാനത്തിലേക്ക് സൈന എത്തിയത്. കേവലം ഒന്നോ രണ്ടോ മണിക്കൂർ പരിശീലനം നടത്തുമ്പോഴേക്കും കാൽമുട്ടുകളിൽ നീർവീക്കം ഉണ്ടാകുന്നത് അന്താരാഷ്ട്ര നിലവാരത്തിലുള്ള പ്രകടനം പുറത്തെടുക്കുന്നതിൽ നിന്ന് അവരെ പിന്നോട്ടുവലിച്ചു.
2016-ലെ റിയോ ഒളിമ്പിക്സിനിടെയാണ് സൈനയ്ക്ക് ആദ്യമായി കഠിനമായ കാൽമുട്ട് പരിക്ക് അനുഭവപ്പെട്ടത്. എങ്കിലും ആത്മവിശ്വാസത്തോടെ തിരിച്ചുവന്ന താരം 2017-ലെ ലോക ചാമ്പ്യൻഷിപ്പിൽ വെങ്കലവും 2018-ലെ കോമൺവെൽത്ത് ഗെയിംസിൽ സ്വർണ്ണവും നേടി തന്റെ കരുത്ത് തെളിയിച്ചിരുന്നു. എന്നാൽ 2024-ന് ശേഷം മത്സരരംഗത്ത് സജീവമല്ലാതിരുന്ന സൈന, തന്റെ ശരീരം ഇനി കഠിനമായ മത്സരങ്ങളെ താങ്ങില്ലെന്ന് തിരിച്ചറിഞ്ഞ് വലിയ ആഘോഷങ്ങളില്ലാതെ കരിയർ അവസാനിപ്പിക്കാൻ തീരുമാനിക്കുകയായിരുന്നു.
