ഇന്ത്യൻ ഹോക്കിക്ക് നൽകിയ മികച്ച സംഭാവനകളെ മാനിച്ച്, ഇന്ത്യയിലെ മൂന്നാമത്തെ പരമോന്നത സിവിലിയൻ ബഹുമതിയായ പത്മഭൂഷൺ പുരസ്കാരം പ്രശസ്ത ഹോക്കി ഇതിഹാസം പി.ആർ. ശ്രീജേഷിന് ലഭിച്ചു. 2024 ലെ പാരീസ് ഒളിമ്പിക്‌സിൽ അവിസ്മരണീയ പ്രകടനം കാഴ്ചവച്ചതിന് ശേഷം ശ്രീജേഷ് അന്താരാഷ്ട്ര ഹോക്കിയിൽ നിന്ന് വിരമിച്ചതിന് പിന്നാലെയാണ് ഈ പ്രഖ്യാപനം.
ഇന്ത്യൻ ഹോക്കിയുടെ ചരിത്രത്തിലെ ഏറ്റവും മികച്ച ഗോൾകീപ്പർമാരിൽ ഒരാളായി വാഴ്ത്തപ്പെടുന്ന ശ്രീജേഷിന് ഏകദേശം രണ്ട് പതിറ്റാണ്ടോളം നീണ്ടുനിന്ന തിളക്കമാർന്ന കരിയർ ഉണ്ടായിരുന്നു. ഇപ്പോൾ ശ്രീജേഷ് ഇന്ത്യൻ യുവ ഹോക്കി ടീമിന്റെ പരിശീലകനായി പ്രവർത്തിക്കുകയാണ്.
വർഷങ്ങളായി, ഏഷ്യൻ ഗെയിംസിലും ചാമ്പ്യൻസ് ട്രോഫിയിലും നിരവധി എഫ്‌ഐഎച്ച് ടൂർണമെന്റുകളിലും ഇന്ത്യയുടെ വിജയങ്ങളിൽ ശ്രീജേഷ് പ്രധാന പങ്കുവഹിച്ചു. 2021-ൽ ഖേൽ രത്‌നയും 2017-ൽ പത്മശ്രീയും ശ്രീജേഷിന് ലഭിച്ചിട്ടുണ്ട്.
