പ്രൊ കബഡി ലീഗിലെ 82ാം മത്സരത്തില്‍ മികച്ച ത്രില്ലര്‍ വിജയവുമായി പട്ന പൈറേറ്റ്സ്. ബെംഗളൂരു ബുള്‍സിന്റെ വെല്ലുവിളികളെ അതിജീവിച്ച് പൈറേറ്റ്സ് 35-32 എന്ന സ്കോറിനാണ് വിജയം കുറിച്ചത്. 23-11നു വ്യക്തമായ ലീഡ് ഇടവേള സമയത്ത് പട്ന പൈറേറ്റ്സ് സ്വന്തമാക്കിയെങ്കിലും രോഹിത് കുമാറിന്റെ ബലത്തില്‍ മികച്ച തിരിച്ചുവരവ് ബുള്‍സ് രണ്ടാം പകുതിയില്‍ നടത്തി. അവസാന മിനുട്ടുകളില്‍ തുടരെ പോയിന്റുകള്‍ നേടി ലീഡ് ബുള്‍സ് കുറച്ച് കൊണ്ടുവന്നെങ്കിലും ഫൈനല്‍ വിസില്‍ ഏറെ വൈകാതെ മുഴങ്ങിയപ്പോള്‍ മൂന്ന് പോയിന്റിന്റെ വിജയം പട്ന പൈറേറ്റ്സ് സ്വന്തമാക്കി.
13 പോയിന്റ് നേടി രോഹിത് കുമാര്‍ ആണ് ബെംഗളൂരുവിന്റെ ടോപ് സ്കോറര്‍. പവന്‍ ഷെഹ്റാവത്ത് 6 പോയിന്റ് നേടി. പട്ന നിരയില്‍ പര്‍ദീപ് നര്‍വാല്‍ 11 പോയിന്റ് നേടി. 22-18നു ലീഡ് റെയിഡിംഗില്‍ ബെംഗളൂരുവിനായിരുന്നുവെങ്കില്‍ 10-7നു പ്രതിരോധത്തില്‍ പട്ന തിളങ്ങി. ഇരു ടീമുകളും ഓരോ തവണ മറു പക്ഷത്തെ ഓള്‍ഔട്ട് ആക്കിയ മത്സരം സ്വന്തമാക്കുവാന്‍ പട്നയെ സഹായിച്ചത് അധിക പോയിന്റുകളിലെ മുന്നേറ്റമായിരുന്നു. 5-1നു അധിക പോയിന്റുകളില്‍ പട്ന മുന്നില്‍ നിന്നു.
