ഇന്ത്യയുടെ കൗമാര താരം അനാഹത് സിംഗ് പിഎസ്എ ബ്രോൺസ് സ്ക്വാഷ് ഓൺ ഫയർ ഓപ്പണിന്റെ ഫൈനലിൽ പ്രവേശിച്ചു. ആവേശകരമായ സെമിഫൈനലിൽ ലോക 23-ാം നമ്പർ താരമായ അമേരിക്കയുടെ സബ്രീന സോബിയെ 3-1 എന്ന സ്കോറിന് പരാജയപ്പെടുത്തിയാണ് അനാഹത് തന്റെ ആദ്യ പിഎസ്എ ടൂർ കിരീടത്തിനരികിലെത്തിയത്. സ്കോർ: 11-9, 11-3, 9-11, 11-5.
ക്വാർട്ടർ ഫൈനലിൽ സന ഇബ്രാഹിമിനെതിരെ നടത്തിയ അവിശ്വസനീയമായ തിരിച്ചുവരവിന് ശേഷം, സെമിഫൈനലിലും ലോക റാങ്കിംഗിൽ തന്നെക്കാൾ മുന്നിലുള്ള താരത്തെ അനാഹത് നിഷ്പ്രഭയാക്കി.
മത്സരത്തിന്റെ തുടക്കം മുതൽ തന്നെ മികച്ച നിയന്ത്രണവും ആക്രമണ ശൈലിയും പുറത്തെടുത്ത അനാഹത് രണ്ടാം ഗെയിമിൽ സബ്രീനയെ പൂർണ്ണമായും ആധിപത്യത്തിലാക്കി. മൂന്നാം ഗെയിം നഷ്ടപ്പെട്ടെങ്കിലും, നാലാം ഗെയിമിൽ കൃത്യതയാർന്ന ഷോട്ടുകളിലൂടെ താരം വിജയം ഉറപ്പിക്കുകയായിരുന്നു. 17 വയസ്സുകാരിയായ അനാഹത് നിലവിൽ ലോക റാങ്കിംഗിൽ 31-ാം സ്ഥാനത്താണ്.
ഫൈനലിൽ ഒന്നാം സീഡും ലോക പത്താം നമ്പർ താരവുമായ ഇംഗ്ലണ്ടിന്റെ ജോർജിന കെന്നഡിയാണ് അനാഹതിന്റെ എതിരാളി. കരിയറിലെ ആദ്യത്തെ പിഎസ്എ ടൂർ കിരീടം ലക്ഷ്യമിട്ടിറങ്ങുന്ന അനാഹത്തിന് ഈ ഫൈനൽ മത്സരം വലിയൊരു പരീക്ഷണമായിരിക്കും
