ഫോർമുല വൺ ലോകകിരീടത്തിലേക്ക് അകലം കുറച്ച് ഹാമിൽട്ടൻ

മെക്സിക്കോ ഗ്രാന്റ്‌ പ്രീയിലും ജയം കണ്ടതോടെ ലോക കിരീടം കയ്യെത്തും ദൂരെയാക്കി ബ്രിട്ടീഷ് ഡ്രൈവർ ലൂയിസ് ഹാമിൽട്ടൻ. ആവേശകരമായ റേസിൽ മെഴ്‌സിഡസ് ഡ്രൈവർ ഹാമിൽട്ടൻ ഒന്നാമത് എത്തിയപ്പോൾ ഫെരാരിയുടെ സെബ്യാസ്റ്റ്യൻ വെറ്റൽ ആണ് രണ്ടാമത് എത്തിയത്. മൂന്നാമത് ഹാമിൽട്ടന്റെ സഹതാരം ബോട്ടാസ് എത്തിയപ്പോൾ ഫെരാരിയുടെ ചാൾസ്‌ ലെക്ലെർക്ക് നാലാമത് ആയി. അതേസമയം പോൾ പൊസിഷൻ നിഷേധിച്ച റെഡ് ബുള്ളിന്റെ മാർക്ക് വെർസ്റ്റാപ്പൻ ആറാമത് ആയി. ഇന്നലെ യോഗ്യതയിൽ ഒന്നാമത് എത്തിയ വേർസ്റ്റാപ്പനു പോൾ പൊസിഷൻ നിഷേധിച്ചത് വിവാദമായിരുന്നു. വെർസ്റ്റാപ്പൻ ഇതിനെതിരെ രൂക്ഷമായി ആണ് പ്രതികരിച്ചത്.

പോൾ പൊസിഷനിൽ തുടങ്ങിയ ലെക്ലെർക്കിന്റെയും ഫെരാരിയുടെയും കടുത്ത പോരാട്ടം അതിജീവിച്ചാണ് റേസ് മൂന്നാമത് ആയി തുടങ്ങിയ ഹാമിൽട്ടൻ മെക്സിക്കൻ ഗ്രാന്റ്‌ പ്രീ ജയിച്ചത്. ഇതോടെ തുടർന്ന് വരുന്ന അമേരിക്കൻ ഗ്രാന്റ്‌ പ്രീയിൽ അത്ഭുതം ഒന്നും സംഭവിച്ചില്ലെങ്കിൽ ഹാമിൽട്ടൻ ജേതാവ് ആവും എന്നുറപ്പായി. നിലവിൽ രണ്ടാമതുള്ള ബോട്ടാസ് അമേരിക്കയിൽ ഒന്നാമത് ആയാലും ആദ്യ 8 ൽ സ്ഥാനം പിടിക്കാൻ ആയാൽ ഹാമിൾട്ടനു തന്റെ ആറാം ലോകകിരീടം ഉയർത്താം. ഉടമസ്ഥരിൽ മുമ്പേ തന്നെ കിരീടം ഉറപ്പിച്ചിരുന്നു മെഴ്‌സിഡസ്. അമേരിക്കയിൽ ജയത്തോടെ കിരീടം ഉയർത്താൻ ആവും ഹാമിൽട്ടന്റെ ശ്രമം.