2026 ലെ ഫിഫ ലോകകപ്പിന് ശേഷം ഫ്രഞ്ച് ദേശീയ ഫുട്ബോൾ ടീമിന്റെ അടുത്ത പരിശീലകനാകാനുള്ള ആഗ്രഹം സിനദിൻ സിദാൻ പ്രകടിപ്പിച്ചു. ഈ ജോലി ഒരു “സ്വപ്നം” ആണെന്നും അതിനായി “കാത്തിരിക്കാൻ വയ്യ” എന്നും അദ്ദേഹം പറഞ്ഞു. 52 കാരനായ ഫ്രഞ്ച് ഇതിഹാസം 2026 ലോകകപ്പിന് ശേഷം ദിദിയർ ദെഷാംപ്സിന് പിൻഗാമിയാകാൻ സാധ്യതയുണ്ടെന്നാണ് പൊതുവെയുള്ള വിലയിരുത്തൽ.
തിങ്കളാഴ്ച അഡിഡാസ് സംഘടിപ്പിച്ച ഒരു പരിപാടിയിൽ സംസാരിക്കുക ആയിരുന്നു സിദാൻ, “ഫ്രഞ്ച് ടീമിന്റെ പരിശീലകനാകാൻ ഞാൻ യോഗ്യനാണെന്ന് തോന്നുന്നു. അവിടെ ഞാൻ കളിക്കുകയും ഏകദേശം 12, 13, 14 വർഷം ചെലവഴിക്കുകയും ചെയ്തിട്ടുണ്ട്. തീർച്ചയായും അതൊരു സ്വപ്നമാണ്. എനിക്ക് കാത്തിരിക്കാൻ വയ്യ.”
1998 ൽ ഫ്രാൻസിനെ ലോകകപ്പ് വിജയത്തിലേക്ക് നയിക്കുകയും 2000 ലെ യൂറോ കപ്പ് നേടാൻ സഹായിക്കുകയും ചെയ്ത സിദാൻ ദേശീയ ടീമുമായി ആഴത്തിലുള്ള ബന്ധം പങ്കുവെക്കുന്നു. അദ്ദേഹത്തിന്റെ മുൻ സഹതാരവും നിലവിലെ പരിശീലകനുമായ ദെഷാംപ്സ് 2012 മുതൽ ടീമിൻ്റെ ചുമതല വഹിക്കുന്നു. 2018 ൽ ലോകകപ്പ് നേടിയ അദ്ദേഹം യൂറോ 2016 ലും 2022 ലെ ലോകകപ്പിലും ഫൈനലിൽ എത്തിയിരുന്നു.
2026 ലോകകപ്പിന് ശേഷം ദെഷാംപ്സ് സ്ഥാനമൊഴിയാൻ ഒരുങ്ങുന്നതിനാൽ സിദാനെ സ്വാഭാവിക പിൻഗാമിയായി കണക്കാക്കുന്നു.
പരിശീലകനെന്ന നിലയിൽ സിദാൻ റയൽ മാഡ്രിഡിനൊപ്പം മികച്ച വിജയങ്ങൾ നേടിയിട്ടുണ്ട്. ക്ലബ്ബിനെ തുടർച്ചയായി മൂന്ന് യുവേഫ ചാമ്പ്യൻസ് ലീഗ് കിരീടങ്ങളിലേക്കും രണ്ട് ലാ ലിഗ കിരീടങ്ങളിലേക്കും അദ്ദേഹം നയിച്ചു. എന്നിരുന്നാലും, 2021 ൽ റയൽ മാഡ്രിഡ് വിട്ടതിന് ശേഷം അദ്ദേഹം ഒരു പരിശീലക സ്ഥാനവും ഏറ്റെടുത്തിട്ടില്ല.
