കഴിഞ്ഞ അമേരിക്കൻ നാഷണൽ വുമൺ സോക്കർ ലീഗിൽ റെക്കോർഡുകൾ സൃഷ്ടിച്ച സാം കെറിനെ വേണ്ടെന്ന് വെച്ച് സ്കൈ ബ്ലൂ എഫ് സി. കഴിഞ്ഞ ദിവസം നടന്ന വുമൺസ് സോക്കർ ലീഗ് ഡ്രാഫ്റ്റിനു ശേഷമാണ് സാം കെറിനെ ചികാഗോ റെഡ് സ്റ്റാർസിന് കൈമാറാൻ സ്കൈ ബ്ലൂ തീരുമാനിച്ചത്. ഇതോടെ മാർച്ചിൽ തുടങ്ങുന്ന അടുത്ത വുമൺസ് സോക്കർ ലീഗിൽ വനിതാ ഫുട്ബോളിലെ സൂപ്പർ താരം സാം കെർ ചികാഗോയുടെ ജേഴ്സി അണിയുമെന്ന് ഉറപ്പായി.
കഴിഞ്ഞ വർഷം സ്കൈ ബ്ലൂ ജേഴ്സിയിൽ അമേരിക്കൻ സോക്കർ ലീഗിൽ ഒരു സീസണിൽ ഏറ്റവും കൂടുതൽ ഗോൾ എന്ന റെക്കോർഡ് സാം കെർ ഭേദിച്ചിരുന്നു. കെർ ചിക്കാഗോയിൽ എത്തിയപ്പോൾ ചികാഗോയുടെ അമേരിക്കൻ രാജ്യാന്തര താരം ക്രിസ്റ്റൻ ഹൗസ്റ്റൺ ഡാഷിലേക്ക് കൂടുമാറി. ഹൗസ്റ്റൺ ഡാഷിലെ താരം കാർലി ലോയിഡ് സ്കൈ ബ്ലൂവിലേക്കും പോയി.
കാർലി ലോയിഡിനെ സ്കൈ ബ്ലൂവിലേക്ക് എത്തിക്കാൻ വേണ്ടിയാണ് സാം കെറിനെ റിലീസ് ചെയ്യാൻ തീരുമാനിച്ചത് എന്നത് സ്കൈ ബ്ലൂ ആരാധകർക്കിടയിൽ പ്രതിഷേധം ഉണ്ടാക്കിയിട്ടുണ്ട്. 35കാരിയാണ് കാർലി ലോയിഡ്.
കൂടുതൽ കായിക വാർത്തകൾക്ക് : www.facebook.com/FanportOfficial
