Category: IWL

ഇന്ത്യൻ വനിതാ ലീഗിൽ സേതു എഫ് സിക്ക് തുടർച്ചയായ എട്ടാം വിജയം. ഇന്ന് ഒഡീഷ പോലീസിനെ നേരിട്ട സേതു എഫ് സി എതിരില്ലാത്ത മൂന്ന് ഗോളുകൾക്കാണ് വിജയിച്ചത്. ഇന്ന് 27ആം മിനുട്ടിൽ ക്യാപ്റ്റൻ സന്ധ്യ രംഗനാഥനിലൂടെ സേതു എഫ് സി ലീഡ് എടുത്തു. പിന്നാലെ ദേവ്നേത റോയിയിലൂടെ സേതു എഫ് സി ലീഡ് ഇരട്ടിയാക്കി. രണ്ടാം പകുതിയിൽ രേണു റാണിയിലൂടെ സേതു എഫ് സി മൂന്നാം ഗോളും നേടി വിജയം ഉറപ്പിച്ചു.

ഈ വിജയത്തോടെ സേതു എഫ് സിക്ക് 8 മത്സരങ്ങളിൽ നിന്ന് 24 പോയിന്റായി. സേതു എഫ് സി ഇപ്പോൾ ലീഗിൽ ഒന്നാമത് നിൽക്കുകയാണ്. ഒരു മത്സരം കുറവ് കളിച്ച ഗോകുലത്തിന് 21 പോയിന്റ് ഉണ്ട്.

ഐ.ഡബ്ല്യൂ.എല്‍
ഗോകുലം കേരള ഇന്ന് അറ എഫ്.സിക്കെതിരേ

ഇന്ത്യന്‍ വനിതാ ഫുട്‌ബോള്‍ ലീഗില്‍ ഗോകുലം കേരള ഇന്ന് അറ എഫ്.സിയെ നേരിടും. ഇന്ന് രാത്രി 7.30ന് കലിങ്ക സ്റ്റേഡിയത്തിലാണ് മത്സരം. ടൂര്‍ണമെന്റില്‍ കളിച്ച അഞ്ച് മത്സരത്തിലും ജയം സ്വന്തമാക്കിയ ഗോകുലം ആറാം ജയം തേടിയാണ് അറ എഫ്.സിയെ നേരിടുന്നത്. അഞ്ച് മത്സരത്തില്‍ നിന്നായി 36 ഗോളുകളാണ് ഗോകുലം കേരള ഇതുവരെ അടിച്ചത്. ഒത്തിണക്കമുള്ള മുന്നേറ്റനിരയും മധ്യനിരയും തമ്മിലുള്ള കരുത്ത് കൊണ്ടായിരുന്നു ഗോകുലത്തിന് ഇത്രയും ഗോള്‍ സ്വന്തമാക്കാന്‍ കഴിഞ്ഞത്. അതേ സമയം ലീഗില്‍ ഒരു ഗോള്‍ മാത്രമേ ഗോകുലം വഴങ്ങിയിട്ടുള്ളു.

അഞ്ച് മത്സരത്തില്‍ നിന്ന് 15 പോയിന്റ് സ്വന്തമാക്കിയ ഗോകുലം കേരള ഇപ്പോള്‍ പട്ടികയില്‍ ഒന്നാം സ്ഥാനത്താണ്. ഇന്നത്തെ മത്സരത്തിലും ജയം തുടര്‍ന്ന് പട്ടികയിലെ ഒന്നാം സ്ഥാനം നിലനിര്‍ത്തുക എന്നാതാണ് പരിശീലകന്‍ ആന്റണി ആന്‍ഡ്രൂസിന്റെയും സംഘത്തിന്റെയും ലക്ഷ്യം.

അതേ സമയം പട്ടികയില്‍ ഏഴാം സ്ഥാനത്ത് നില്‍ക്കുന്ന അറ എഫ്.സി ഗോകുലത്തിന് വെല്ലുവിളി ഉയര്‍ത്തില്ലെങ്കിലും വീണു കിട്ടുന്ന അവസരം മുതലാക്കുന്നവരാണ് അറ എഫ്.സി. അതിനാല്‍ പഴുതടച്ചുള്ള പ്രതിരോധമായിരിക്കും ഗോകുലം നടപ്പാക്കുക. അഞ്ച് മത്സരത്തില്‍ നിന്ന് രണ്ട് ജയവും മൂന്ന് തോല്‍വിയുമാണ് അറ എഫ്.സിയുടെ സമ്പാദ്യം. അതിനാല്‍ സമ്മര്‍ദമില്ലാതെ ആറാം മത്സരവും ജയിക്കാമെന്ന പ്രതീക്ഷയിലാണ് ഗോകുലം കേരള ഇന്ന് കലിങ്ക സ്‌റ്റേഡിയത്തില്‍ കളിക്കാനിറങ്ങുന്നത്.

ഹീറോ ഇന്ത്യൻ വനിതാ ലീഗിൽ ഭുവനേശ്വറിലെ ഏഴാം ബറ്റാലിയൻ ഗ്രൗണ്ടിൽ SSB വിമൻ എഫ്‌സിയെ നേരിട്ട AIFF-ന്റെ ഡെവലപ്‌മെന്റ് ടീമായ ഇന്ത്യൻ ആരോസിന് 2-0ന്റെ വിജയം. രണ്ടാം പകുതിയിൽ വിംഗർ സുനിത മുണ്ടയും സ്‌ട്രൈക്കർ അപുർണ നർസാരിയുമാണ് ആരോസിന്റെ ഗോളുകൾ നേടിയത്. അപൂർണ കളിയിലെ താരവുമായി. ഈ വിജയത്തോടെ ഇന്ത്യൻ ആരോസ് ഹീറോ ഐഡബ്ല്യുഎല്ലിൽ അഞ്ച് മത്സരങ്ങളിൽ നിന്ന് 10 പോയിന്റായി. നാലാം സ്ഥാനത്താണ് ആരോസ് ഉള്ളത്.

ബ്രേക്കില്ലാതെ ഗോകുലം കേരള

ഇന്ത്യന്‍ വനിതാ ലീഗില്‍ ഗോകുലം കേരള വനിതാ ടീമിന് ജയം. ഇന്ന് നടന്ന മത്സരത്തില്‍ എതിരില്ലാത്ത എട്ട് ഗോളിന് മാതാ രുഗ്മിണി ഫുട്‌ബോള്‍ ക്ലബിനെയാണ് ഗോകുലം കേരള പരാജയപ്പെടുത്തിയത്. മൂന്നാം മിനുട്ടില്‍ മനീഷ കല്യാണിന്റെ ഗോളോടെയായിരുന്നു ഗോകുലം ഗോള്‍ വേട്ടക്ക് തുടക്കമിട്ടത്. മത്സരം പുരോഗമിക്കുന്നതിനിടെ മധ്യനിര താരം കഷ്മിന പരുക്കേറ്റ് പുറത്ത് പോയി. പിന്നീട് മഞ്ജുവായിരുന്നു കളത്തിലെത്തിയത്. 17ാം മിനുട്ടില്‍ ഗോകുലം കേരളയുടെ രണ്ടാം ഗോളും പിറന്നു. സൗമ്യയുടെ വകയായിരുന്നു ഗോകുലത്തിന്റെ രണ്ടാം ഗോള്‍. രണ്ട് ഗോള്‍ വന്നതോടെ എതിര്‍ ടീം ബസ് പാര്‍ക്കിങ് പ്രതിരോധം പുറത്തെടുത്തു. എന്നാല്‍ കിട്ടിയ അവസരത്തിലെല്ലാം ഗോകുലം അവസരം മുതലെടുത്തു. 19ാം മിനുട്ടില്‍ ഘാന താരം എല്‍ഷദായിലൂടെ ഗോകുലം ലീഡ് മൂന്നാക്കി ഉയര്‍ത്തി. പിന്നീട് 25, 28 മിനുട്ടുകളില്‍കൂടി ഗോള്‍ നേടിയതോടെ എല്‍ ഷദായി ഹാട്രിക് സ്വന്തമാക്കുകയും ഗോകുലത്തിന്റെ സ്‌കോര്‍ 5-0 എന്നാക്കുകയും ചെയ്തു. ആദ്യ പകുതിയുടെ അധിക സമയത്ത് സൗമ്യ രണ്ടാം ഗോളും നേടിയതോടെ ആദ്യ പകുതിയില്‍ എതിരില്ലാത്ത ആറു ഗോളിന്റെ ലീഡ് സ്വന്തമാക്കാന്‍ ഗോകുലം കേരളക്കായി.

താരതെമ്യേന ഈസി മത്സരം ആയതിനാല്‍ രണ്ടാം പകുതിയില്‍ ഗോകുലം പല താരങ്ങളേയും പിന്‍വലിച്ചു. മുന്നേറ്റത്തില്‍ നിന്ന് മനീഷ, പ്രതിരോധത്തില്‍ നിന്ന് ഡാലിമ ചിബ്ബര്‍, എല്‍ ഷദായ് തുടങ്ങിയവരെ പിന്‍വലിച്ചു. എങ്കിലും ഗോകുലത്തിന്റെ ഗോള്‍ദാഹത്തിന് കുറവുണ്ടായില്ല. 66ാം മിനുട്ടില്‍ മാനസയുടെ ഗോള്‍ പിറന്നു. ഇതോടെ ഇന്ത്യന്‍ വനിതാ ലീഗില്‍ ഗോള്‍ നേടുന്ന രണ്ടാമത്തെ മലയാളി താരമാകാന്‍ മാനസക്ക് കഴിഞ്ഞു. പകരക്കാരിയായി എത്തിയ ജ്യോതികൂടി ഗോള്‍ സ്വന്തമാക്കിയതോടെ ഗോകുലത്തിന്റെ ഗോള്‍ പട്ടിക പൂര്‍ത്തിയായി. 85ാം മിനുട്ടിലായിരുന്നു ജ്യോതിയുടെ ഗോള്‍. 5ന് കലിങ്ക സ്‌റ്റേഡിയത്തില്‍ അറ എഫ്.സിക്കെതിരേയാണ് ഗോകുലത്തിന്റെ അടുത്ത മത്സരം.

ഗോകുലത്തിന്റെ അഞ്ചാം വിജയമാണിത്.5 മത്സരങ്ങളിൽ നിന്ന് 37 ഗോളുകൾ അടിച്ച ഗോകുലം ഒരു ഗോൾ മാത്രമാണ് വഴങ്ങിയത്.

ഭൂവനേശ്വര്‍: ഒഡിഷയില്‍ നടക്കുന്ന ഇന്ത്യന്‍ വനിതാ ഫുട്‌ബോള്‍ ലീഗില്‍ ഗോകുലം കേരള ഇന്ന് (28-4-22) നാലാം മത്സരത്തിനിറങ്ങും. രാത്രി 7.30ന് കലിങ്ക സ്‌റ്റേഡിയത്തില്‍ നടക്കുന്ന മത്സരത്തില്‍ പിഫ സ്‌പോട്‌സ് എഫ്.സിയേയാണ് ഗോകുലം നേരിടുന്നത്.

ആദ്യ മൂന്ന് മത്സരത്തിലും ജയം സ്വന്തമാക്കിയ ഗോകുലം കേരള ഇപ്പോള്‍ പോയിന്റ് പട്ടികയില്‍ ഒന്നാം സ്ഥാനത്താണ്. മൂന്ന് മത്സരത്തില്‍ മൂന്നിലും ജയിച്ച ഗോകുലം കേരള ഒന്‍പത് പോയിന്റുമായാണ് പട്ടികയില്‍ ഒന്നാം സ്ഥാനത്ത് തുടരുന്നത്. മധുരയില്‍ നിന്നുള്ള സേതു എഫ്.സി, കര്‍ണാടകയില്‍ നിന്നുള്ള കിക്സ്റ്റാര്‍ട് എഫ്.സി എന്നി ക്ലബുകളും മൂന്ന് മത്സരത്തില്‍ ജയിച്ചിട്ടുണ്ടെങ്കിലും ഗോള്‍ ശരാശരിയില്‍ ഗോകുലം കേരളക്കാണ് മുന്‍തൂക്കം. മൂന്ന് മത്സരത്തില്‍ നിന്ന് മാത്രമായി 23 ഗോളുകളാണ് ഗോകുലം എതിര്‍ വലിയിലെത്തിച്ചിട്ടുള്ളത്. എന്നാല്‍ ഒരു ഗോള്‍ പോലും വഴങ്ങുകുയം ചെയ്തിട്ടില്ല.

ഹന്‍സ് വുമണ്‍ ഫുട്‌ബോള്‍ ക്ലബിനെതിരേയുള്ള മത്സരത്തില്‍ 4 -2-3-1 ഫോര്‍മേഷനിലായിരുന്നു ഗോകുലം കേരള ഇറങ്ങിയത്. പ്രതിരോധത്തില്‍ ഉണ്ടായിരുന്ന താരങ്ങളെല്ലാം കൃത്യമായി ഉത്തരവാദിത്തം നിറവേറ്റിയതോടെയാണ് ഗോകുലത്തിന്റെ പോസ്റ്റില്‍ നിന്ന് ഗോള്‍ ഒഴിഞ്ഞു നിന്നത്. അതേ സമയം മൂന്ന് മത്സരം കളിച്ച പിഫക്ക് ഒരു മത്സരത്തില്‍ മാത്രമേ ജയിക്കാനായിട്ടുള്ള. ഒരു സമനലിയും ഒരു തോല്‍വിയുമാണ് മറ്റു ഫലങ്ങള്‍. അവസാന ജയത്തിന്റെ ആത്മവിശ്വാസത്തിലിറങ്ങുന്ന ഗോകുലം കേരള ഇന്നും ജയത്തില്‍ കുറഞ്ഞതൊന്നും ആഗ്രഹിക്കുന്നില്ല. മത്സരം ഇന്ത്യൻ ഫുട്ബോൾ യൂട്യൂബ് ചാനലിൽ തത്സമയം ഉണ്ടായിരിക്കുന്നതാണ്.