ന്യൂകാസിൽ അവരുടെ വലിയ ട്രാൻസ്ഫർ പൂർത്തിയാക്കി കഴിഞ്ഞു. ടൊണാലിയുടെ ട്രാൻസ്ഫർ ഇന്ന് ക്ലബ് ഔദ്യോഗികമായി പ്രഖ്യാപിച്ചു. 2028വരെയുള്ള കരാർ ന്യൂകാസിലിൽ ടൊണാലി ഒപ്പുവെച്ചു. എ സി മിലാനിൽ നിന്നാണ് താരം ഇംഗ്ലണ്ടിലേക്ക് എത്തുന്നത്‌. താരത്തിന് 8 മില്യൺ വാർഷിക വേതനം ലഭിക്കും. രണ്ട് മില്യൺ ആഡ് ഓണും ലഭിക്കും. 2020 മുതൽ ടൊണാലി എ സി മിലാനിൽ ഉണ്ട്. അവർക്ക് ഒപ്പം ലീഗ് കിരീടവും നേടിയിട്ടുണ്ട്
ചാമ്പ്യൻസ് ലീഗ് യോഗ്യത നേടിയ എഡി ഹൗവിന്റെ ന്യൂകാസ്റ്റിൽ യുണൈറ്റഡ് ട്രാൻസ്ഫർ മാർക്കറ്റിൽ വലിയ നീക്കങ്ങൾ തന്നെ നടത്തും എന്ന് നേരത്തെ തന്നെ വ്യക്തമായിരുന്നു. ടൊണാലി വരുന്നതോടെ ഇപ്പോൾ തന്നെ ശക്തമായി നിൽക്കുന്ന ന്യൂകാസിൽ മിഡ്ഫീൽഡ് അതി ശക്തമാകും.
ഏതാണ്ട് 70 മില്യൺ യൂറോക്ക് ആണ് താരത്തിനെ ഇംഗ്ലീഷ് ക്ലബ് സ്വന്തമാക്കിയത്. ന്യൂകാസിലിന്റെ ടൊണാലിക്കായുള്ള മൊത്തം പാക്കേജ് 140 മില്യണോളമാണെന്ന് ഡി മാർസിയോ പറയുന്നു. ന്യൂകാസിൽ ചരിത്രത്തിൽ ഒരു താരത്തിനായി മുടക്കുന്ന ഏറ്റവും വലിയ തുകയായിരിക്കും ഇത്.
