മാഞ്ചസ്റ്റർ യുണൈറ്റഡ് സെന്റർ ബാക്ക് ഹാരി മഗ്വയറിനെ സ്വന്തമാക്കാനായുള്ള വെസ്റ്റ് ഹാം യുണൈറ്റഡിന്റെ ശ്രമം തുടരുന്നു.വെസ്റ്റ് ഹാം യുണൈറ്റഡ് 30 മില്യന്റെ ബിഡ് മാഞ്ചസ്റ്റർ യുണൈറ്റഡിന് മുന്നിൽ വെച്ചതായി ഫബ്രിസിയോ റൊമാനോ റിപ്പോർട്ട് ചെയ്യുന്നു. ഇരു ക്ലബുകളും ഇപ്പോൾ ചർച്ചകൾ നടത്തുകയാണ്. മറ്റു പ്രീമിയർ ലീഗ് ക്ലബുകളും മഗ്വയറിനായി രംഗത്ത് ഉണ്ട്.
മാഞ്ചസ്റ്റർ യുണൈറ്റഡ് താരത്തിന് 50 മില്യൺ യൂറോ ആണ് വിലയിട്ടിരിക്കുന്നത്‌. എന്നാൽ 35 മില്യൺ നൽകിയാൽ താരത്തെ യുണൈറ്റഡ് വിട്ടു നൽകിയേക്കും. വെസ്റ്റ് ഹാമിന്റെ ഈ ബിഡ് യുണൈറ്റഡ് സ്വീകരിക്കാൻ ആണ് സാധ്യത. സീസൺ ആരംഭിക്കും മുമ്പ് മഗ്വയറിനെ വിറ്റ് പകരം ഒരു ഡിഫൻഡറെ സ്വന്തമാക്കാൻ യുണൈറ്റഡ് ആഗ്രഹിക്കുന്നുണ്ട്.
കഴിഞ്ഞ മാസം മഗ്വയറിനെ ക്യാപ്റ്റൻ സ്ഥാനത്ത് നിന്ന് മാഞ്ചസ്റ്റർ യുണൈറ്റഡ് നീക്കിയിരുന്നു. മഗ്വയറും മാഞ്ചസ്റ്റർ യുണൈറ്റഡ് വിടാൻ ആണ് ആഗ്രഹിക്കുന്നത്. കഴിഞ്ഞ സീസണിൽ അപൂർവ്വ മത്സര‌ങ്ങളിൽ മാത്രമാണ് മഗ്വയർ യുണൈറ്റഡ് ആദ്യ ഇലവനിൽ ഉണ്ടായിരുന്നത്. ഇറങ്ങിയപ്പോൾ ആകട്ടെ അത്ര തൃപ്തികരമായ പ്രകടനമല്ല മഗ്വയറിൽ നിന്ന് ഉണ്ടായത്. ലിസാൻഡ്രോ മാർട്ടിനസ്, വരാനെ, ലിൻഡെലോഫ് എന്നിവർക്ക് പിറകിൽ മാത്രമാണ് മഗ്വയറിന് സെന്റർ ബാക്ക് പൊസിഷനിൽ ഉള്ള സ്ഥാനം.
2019ൽ ലെസ്റ്റർ സിറ്റിയിൽ നിന്ന് ഒരു റെക്കോർഡ് തുകക്ക് ആണ് മഗ്വയർ മാഞ്ചസ്റ്റർ യുണൈറ്റഡിൽ എത്തിയത്. അന്ന് മുതൽ വലിയ വിമർശനങ്ങൾ താരം നേരിടുന്നുണ്ട്.
