മലപ്പുറം: പുതിയ സീസണിന് മൂന്നോടിയായി ക്ലബിൻറെ ഔദ്യോഗിക ആരാധക കൂട്ടായ്മായ അൾട്രാസിന് പ്രത്യേക വിരുന്നൊരുക്കി മലപ്പുറം എഫ്സി. ക്ലബിന് ആരാധകരോടുള്ള സ്നേഹം പ്രകടമാക്കുന്നതായിരുന്നു വിരുന്ന്. ടീമിൻറെ പരിശീലന കേന്ദ്രമായ കാലിക്കറ്റ് യൂണിവേഴ്സിറ്റി സ്റ്റേഡിയത്തിലാണ് 300 ഓളം വരുന്ന ആരാധകർ ഒത്തുകൂടിയത്. വരാൻ പോകുന്ന സീസണിന് മുന്നോടിയായി ടീമിന് അൾട്രാസിൻറെ ശക്തമായ പിന്തുണ പ്രഖ്യാപിക്കുന്നതുമായിരുന്നു പരിപാടി.
പരിപാടിയിൽ ക്ലബ് മാനേജ്മെന്റ പ്രധിനിധികളും പരിശീലകരും കളിക്കാരും പങ്കെടുത്ത് ആരാധകരോടൊപ്പം സംവദിക്കുകയും ഫോട്ടോകൾ പങ്കുവെക്കുകയും ചെയ്തു. ആരാധക്കർക്കിടയിലേക്കുള്ള റോയ് കൃഷ്ണയുടെ സർപ്രൈസ് എൻട്രി എല്ലാവർക്കും ആവേശം നൽകി. വലിയ കൈയ്യടികളോടെയാണ് എല്ലാ താരങ്ങളെയും അൾട്രാസ് സ്വാഗതം ചെയ്തത്. സംവേദന സെഷനുകൾ, അൾട്രാസ് പോളോ കിറ്റ് റിലീസ് എന്നിവ നടത്തി. താരങ്ങൾക്കും സ്റ്റാഫ്സിനും അൾട്രാസ് മൊമെന്റോയും സമ്മാനമായി നൽകി.
സംഗമത്തിൽ ടീമിന്റെ വരാനിരിക്കുന്ന സീസണുമായി ബന്ധപ്പെട്ട പദ്ധതികൾ ആരാധകരുമായി പങ്കുവെച്ചു. പുതിയ സീസണിലും ആരാധകരുടെ ഉറച്ച പിന്തുണ ടീമിന് വലിയ ആത്മവിശ്വാസമാകുമെന്ന് ഹെഡ് കോച്ച് മിഗ്വേൽ കോറലും സഹപരിശീലകൻ ക്ലിയോഫസ് അലക്സും വ്യക്തമാക്കി. സൂപ്പർ ലീഗ് കേരളയുടെ പുതിയ സീസണിലേക്ക് തയ്യാറെടുക്കുന്ന മലപ്പുറം എഫ്സി ആരാധകരുടെ ശക്തമായ പിന്തുണയാണ് ഇത്തവണയും ലക്ഷ്യമിടുന്നത്.
