സന്തോഷ് ട്രോഫി ദക്ഷിണ മേഖലാ യോഗ്യതാ റൗണ്ട് മത്സരങ്ങൾ ഇത്തവണ കൊച്ചിയിൽ നടക്കില്ല. നേരത്തെ ഒക്ടോബർ 14 മുതൽ കൊച്ചിയിൽ വെച്ച് നടത്താൻ തീരുമാനിച്ചിരുന്ന മത്സരങ്ങൾ നീട്ടിവെക്കുകയാണ് എന്ന് എ ഐ എഫ് എഫ് അറിയിച്ചിരുന്നു. എന്നാൽ ഐ എസ് എൽ രണ്ടാഴ്ചകകം ആരംഭിക്കുന്നതിനാൽ കൊച്ചിയിൽ വേറെയൊരു ടൂർണമെന്റ് നടത്തേണ്ടതില്ല എന്നതാണ് മത്സരം എ ഐ എഫ് എഫ് മാറ്റാനുള്ള കാരണം എന്നാണ് അറിയാൻ കഴിയുന്നത്.
കൊച്ചിയിൽ നാല് ഗംഭീര പിച്ചുകൾ സന്തോഷ് ട്രോഫി നടത്താം വേണ്ടി ഉണ്ടായിരിക്കെ ആണ് ഐ എസ് എല്ലിന്റെ പേരും പറഞ്ഞുള്ള ഈ മാറ്റം. ഇനി കോഴിക്കോട് വെച്ചാകും മത്സരങ്ങൾ നടക്കുക. അതും നവംബർ 5ന് മാത്രം. ഇത് കോഴിക്കോട് ഗോകുലത്തിന്റെ ഐ ലീഗ് മത്സരങ്ങളെയും ബാധിച്ചേക്കാം. എന്തായാലും ഈ ആഴ്ചയോടെ സന്തോഷ് ട്രോഫി ക്യാമ്പ് നിർത്തി വെക്കാൻ കേരളം തീരുമാനിച്ചേക്കും. ഒക്ടോബർ അവസാന വാരം കോഴിക്കോട് വെച്ച് വീണ്ടും ക്യാമ്പ് പുനരാരംഭിക്കാൻ ആണ് ഇപ്പോൾ കേരള ടീം ആലോചിക്കുന്നത്.
