പോർച്ചുഗീസ് മധ്യനിര താരം റൂബൻ നെവെസ് സൗദി അറേബ്യൻ ക്ലബ്ബായ അൽ ഹിലാലുമായി പുതിയ ദീർഘകാല കരാറിൽ ഒപ്പുവെച്ചു. ട്രാൻസ്ഫർ വിദഗ്ധൻ ഫബ്രിസിയോ റൊമാനോ റിപ്പോർട്ട് ചെയ്തതനുസരിച്ച്, 2029 ജൂൺ വരെ നെവെസ് ക്ലബ്ബിൽ തുടരും. 2023-ൽ വോൾവ്സിൽ നിന്ന് റെക്കോർഡ് തുകയ്ക്ക് അൽ ഹിലാലിലെത്തിയ നെവെസിനെ സ്വന്തമാക്കാൻ മാഞ്ചസ്റ്റർ യുണൈറ്റഡ് ഉൾപ്പെടെയുള്ള പ്രമുഖ യൂറോപ്യൻ ക്ലബ്ബുകൾ താൽപ്പര്യപ്പെട്ടിരുന്നു.
എന്നാൽ യൂറോപ്പിലെ ഗ്ലാമർ ഓഫറുകൾ നിരസിച്ചുകൊണ്ട് സൗദി ക്ലബ്ബിന്റെ ദീർഘകാല പദ്ധതികൾക്കൊപ്പം നിൽക്കാനാണ് നെവെസ് തീരുമാനിച്ചത്.
അൽ ഹിലാലിന്റെ മധ്യനിരയിലെ അവിഭാജ്യ ഘടകമായ നെവെസ്, ഇതിനോടകം തന്നെ നൂറിലധികം മത്സരങ്ങളിൽ ക്ലബ്ബിനായി കളത്തിലിറങ്ങുകയും ഗോളുകളിലൂടെയും അസിസ്റ്റുകളിലൂടെയും മികച്ച പ്രകടനം പുറത്തെടുക്കുകയും ചെയ്തിട്ടുണ്ട്.
