ലോകത്തിലെ ഏറ്റവും മികച്ച ലീഗുകളിലൊന്നായി മാറാൻ സൗദി പ്രോ ലീഗിനാകും എന്ന് ക്രിസ്റ്റ്യാനോ റൊണാൾഡോ. ലോകത്തെ ഏറ്റവും മികച്ച മൂന്ന് ലീഗുകളിൽ ഒന്നാകാൻ സൗദി ലീഗിന് ആകും എന്ന് അൽ നസർ താരം പറയുന്നു. ഇപ്പോൾ തന്നെ സൗദി ലീഗ് ഫ്രഞ്ച് ലീഗിനെക്കാൾ മുകളിലാണ്. ഫ്രഞ്ച് ലീഗിനെക്കാൾ മികച്ച ഫുട്ബോൾ ആണ് സൗദിയിൽ നടക്കുന്നത്. റൊണാൾഡോ പറഞ്ഞു.
“സൗദി ലോകത്തിലെ ഏറ്റവും മികച്ച മൂന്നോ നാലോ ലീഗുകളിൽ വരുമെന്ന് ഞാൻ വിശ്വസിക്കുന്നു, ഘട്ടം ഘട്ടമായി ഞങ്ങൾ അതിലെത്താൻ പോകുന്നു. സൗദി അറേബ്യ എനിക്ക് ഒരു നല്ല നീക്കമായിരിക്കുമെന്ന് ഞാൻ കരുതി.”ദുബായിൽ നടന്ന ഗ്ലോബ് സോക്കർ അവാർഡിൽ റൊണാൾഡോ പറഞ്ഞു
“കാര്യങ്ങൾ മാറുന്നു; ലോകം മാറുന്നു, ഫുട്ബോൾ മാറുന്നു, നിയമങ്ങൾ മാറുന്നു. എല്ലാം മാറുന്നു. എന്റെ നീക്കം ഒരു നല്ല നീക്കമായിരുന്നു. എനിക്ക് വളരെ സന്തോഷം തോന്നുന്നു; നിരവധി കളിക്കാർ, പരിശീലകർ, ഡയറക്ടർമാർ, അവിടേക്ക് നീങ്ങുന്നു. ഫുട്ബോളിന്റെ ഉയരങ്ങളിൽ എത്താനുള്ള ശ്രമത്തിലാണ് സൗദി. ഇതിന് വളരെ സമയമെടുക്കും, എന്നാൽ പടിപടിയായി ഉയരത്തിലെത്താൻ ആകും” റൊണാൾഡോ പറഞ്ഞു.
