പുതിയ ദീർഘകാല കരാറിലൂടെ യുവ ഡിഫൻഡർ റൗൾ അസെൻസിയോയുടെ ഭാവി സുരക്ഷിതമാക്കാൻ ഒരുങ്ങുകയാണ് റയൽ മാഡ്രിഡ്. എഡർ മിലിറ്റാവോ, ഡേവിഡ് അലബ, ഔറേലിയൻ ചൗമേനി തുടങ്ങിയ പ്രധാന കളിക്കാർ പരിക്കിനെത്തുടർന്ന് പുറത്തായ സമയത്ത് റയലിന്റെ രക്ഷകനായി അവതരിച്ച 21 കാരനായ അസെൻസിയോ ഇപ്പോൾ ആദ്യ ടീമിൻ്റെ സുപ്രധാന ഘടകമാണ്.
കാസ്റ്റില്ലയിൽ നിന്ന് സ്ഥാനക്കയറ്റം ലഭിച്ചതിന് ശേഷം, നിർണായക മത്സരങ്ങളിൽ ശ്രദ്ധേയമായ പ്രകടനത്തിലൂടെ അസെൻസിയോ തൻ്റെ കഴിവ് തെളിയിച്ചു. ഒസാസുനയ്‌ക്കെതിരായ റയൽ മാഡ്രിഡിൻ്റെ 4-0 വിജയത്തിൽ അസെൻസിയോ തൻ്റെ അരങ്ങേറ്റം കുറിച്ചു
അവിടെ നിന്ന്, യുവ ഡിഫൻഡർ ചാമ്പ്യൻസ് ലീഗിൽ ലിവർപൂളിനെതിരായ 90 മിനിറ്റ് പൂർണ്ണമായ ഔട്ടിംഗും ലാ ലിഗയിൽ ലെഗാനെസിനും ഗെറ്റാഫെയ്‌ക്കുമെതിരെ നേടിയ വിജയങ്ങളും ഉൾപ്പെടെ മികച്ച പ്രകടനങ്ങൾ താരം നടത്തി.
ജനുവരിയിൽ പ്രതിരോധത്തിൽ പുതിയ താരങ്ങളെ റയൽ മാഡ്രിഡ് സൈൻ ചെയ്യില്ല എന്ന് ഉറപ്പാണ്. പകരം, അസെൻസിയോയ്ക്ക് ഒരു പുതിയ കരാർ നൽകി പ്രതിഫലം ഉയർത്താൻ ആണ് ക്ലബ് ഒരുങ്ങുന്നത്. 2026 വരെ പ്രവർത്തിക്കുന്ന അദ്ദേഹത്തിൻ്റെ നിലവിലെ കരാർ മെച്ചപ്പെട്ട നിബന്ധനകളോടെ നീട്ടുന്നതാണ് ക്ലബിന്റെ പദ്ധതി.
