റയൽ മാഡ്രിഡിന് (Real Madrid) കനത്ത തിരിച്ചടി. ക്യാപ്റ്റൻ ഡാനി കാർവഹാലിന് (Dani Carvajal) വലത് കാൽമുട്ടിന് ആർത്രോസ്കോപ്പിക് (Arthroscopic) ശസ്ത്രക്രിയ വേണ്ടിവരുമെന്ന് ക്ലബ്ബ് തിങ്കളാഴ്ച അറിയിച്ചു. മാസങ്ങളായി വെറ്ററൻ ഡിഫൻഡറെ അലട്ടിക്കൊണ്ടിരുന്ന കാൽമുട്ടിലെ ഒരു ‘ലൂസ് ബോഡി’ (Loose body) മെഡിക്കൽ പരിശോധനയിൽ കണ്ടെത്തിയതിനെ തുടർന്നാണ് ശസ്ത്രക്രിയക്ക് വിധേയനാകുന്നത്.
ഇതിനാൽ, താരം 10 ആഴ്ച വരെ കളിക്കളത്തിൽ നിന്ന് വിട്ടുനിൽക്കാൻ സാധ്യതയുണ്ടെന്നും, 2025-ലെ ശേഷിക്കുന്ന മത്സരങ്ങളിൽ കളിക്കാൻ സാധിക്കില്ലെന്നുമാണ് ക്ലബ്ബ് വൃത്തങ്ങൾ സൂചിപ്പിക്കുന്നത്.
നാടകീയമായ എൽ ക്ലാസിക്കോ (El Clasico) പോരാട്ടത്തിൽ ബാഴ്‌സലോണയെ (Barcelona) 2-1 ന് തോൽപ്പിച്ച് റയൽ മാഡ്രിഡ് വിജയം നേടിയതിന് പിന്നാലെയാണ് കാർവഹാലിന്റെ ഈ തിരിച്ചടി. ഈ വിജയത്തോടെ റയൽ മാഡ്രിഡ് ലാലിഗയുടെ (LaLiga) തലപ്പത്ത് തങ്ങളുടെ കറ്റാലൻ എതിരാളികളേക്കാൾ അഞ്ച് പോയിന്റ് മുന്നിൽ ആധിപത്യം ഉറപ്പിച്ചു. എന്നാൽ, സീസണിലെ പ്രധാന മത്സരങ്ങൾ വരാനിരിക്കെ ക്യാപ്റ്റന്റെ അഭാവം ടീമിന്റെ പ്രതിരോധ സ്ഥിരതയെയും സ്ക്വാഡിന്റെ കരുത്തിനെയും പരീക്ഷിക്കും.
പരിക്ക് കാരണം കാർവഹാൽ ഒരുപാട് ബുദ്ധിമുട്ടുകൾ നേരിട്ടിട്ടുണ്ട്. 2024-ന്റെ അവസാനത്തിൽ മൾട്ടിപ്പിൾ ലിഗമെന്റ് (ligament) , ടെൻഡൺ (tendon) എന്നിവയ്ക്ക് പരിക്കേറ്റതിനെ തുടർന്ന് മാസങ്ങളോളം വിശ്രമത്തിലായിരുന്ന താരം ജൂലൈയിൽ നടന്ന ക്ലബ്ബ് ലോകകപ്പിലാണ് കളത്തിലേക്ക് മടങ്ങിയെത്തിയത്.
