ലാലിഗയിൽ റയൽ മാഡ്രിഡും അത്‌ലറ്റിക്കോ മാഡ്രിഡും തമ്മിൽ നടന്ന മാഡ്രിഡ് ഡർബി മത്സരം 1-1 എന്ന നിലയിൽ സമനിലയിൽ പിരിഞ്ഞു. ഈ സീസണിൽ മാഡ്രിഡ് ഡെർബി സമനിലയിലാകുന്നത് ഇത് രണ്ടാം തവണയാണ്. 35-ാം മിനിറ്റിൽ ജൂലിയൻ അൽവാരെസിന്റെ പെനാൽറ്റിയിലൂടെ അത്‌ലറ്റിക്കോ മാഡ്രിഡ് ആണ് ഇന്ന് മുന്നിലെത്തിയത്.
എന്നിരുന്നാലും, രണ്ടാം പകുതിയുടെ തുടക്കത്തിൽ തന്നെ റയൽ മാഡ്രിഡ് പ്രതികരിച്ചു, 50-ാം മിനിറ്റിൽ കൈലിയൻ എംബാപ്പെ അവർക്കായി സമനില നേടി.
റോഡ്രിഗോയ്ക്കും ജൂഡ് ബെല്ലിംഗ്ഹാമിനും നല്ല അവസരങ്ങൾ കിട്ടിയെങ്കിലും ക്രോസ്ബാറിൽ തട്ടി ആ ശ്രമങ്ങൾ പുറത്തായി. ഈ സമനിലയോടെ റയൽ മാഡ്രിഡ് പട്ടികയിൽ ഒന്നാം സ്ഥാനത്ത് തുടരുകയാണ്. റയലിന് 50 പോയിന്റും അത്ലറ്റിക്കോയ്ക്ക് 49 പോയിന്റുമാണ് ഉള്ളത്.
