എഎഫ്‌സി ചാമ്പ്യൻസ് ലീഗ് ഗ്രൂപ്പ് ബി പോരാട്ടത്തിൽ അൽ-ഹിലാൽ അൽ ഐനിനെതിരെ 5-4ന്റെ ആവേശകരമായ വിജയം സ്വന്തമാക്കി. സലേം അൽ-ദവ്‌സാരിയും സൗഫിയാൻ റഹിമിയും ഹാട്രിക്കുകൾ നേടിയ മത്സരം ഒരു ഗോൾ-ഫെസ്റ്റ് തന്നെ ആയിരുന്നു.
ഒരു വർഷത്തിന് ശേഷം പരിക്ക് മാറി എത്തിയ ബ്രസീലിയൻ സൂപ്പർ താരം നെയ്‌മറിന്റെ തിരിച്ചുവരവും ഈ ഗെയിം അടയാളപ്പെടുത്തി. 26-ാം മിനിറ്റിൽ അലക്‌സാണ്ടർ മിട്രോവിച്ചിന്റെ അസിസ്റ്റിൽ നിന്ന് റെനാൻ ലോഡി അൽ-ഹിലാലിനെ മുന്നിലെത്തിച്ചതോടെയാണ് ഗോൾ മഴ ആരംഭിച്ചത്. 39-ാം മിനിറ്റിൽ അൽ ഐൻ പ്രതികരിച്ചു, എറിക്കിന്റെ അസിസ്റ്റിൽ നിന്ന് സൗഫിയാൻ റഹിമി സമനില പിടിച്ചു. ഹാഫ്ടൈമിന് തൊട്ടുമുമ്പ്, 45 + 2 ‘മിനിറ്റിൽ മിലിങ്കോവിച്ച്-സാവിച്ച് സ്കോർ ചെയ്തപ്പോൾ അൽ-ഹിലാൽ വീണ്ടും മുന്നിലെത്തി.
തുടർന്ന് മൂന്ന് മിനിറ്റിന് ശേഷം അൽ-ദവ്സാരിയുടെ ഗോളും കൂടെ വന്നതോടെ 3-1ന് അൽ-ഹിലാൽ ആദ്യ പകുതി അവസാനിപ്പിച്ചു. രണ്ടാം പകുതിയിൽ അൽ ഐൻ തിരിച്ചടിച്ചു, മാറ്റെയോ സനാബ്രിയയുടെ 63-ാം മിനിറ്റിലെ സ്‌ട്രൈക്കിലൂടെ ലീഡ് 3-2 ആയി ചുരുക്കി.
അൽ-ദവ്‌സാരി രണ്ട് മിനിറ്റിനകം തന്റെ രണ്ടാം ഗോൾ നേടി, സ്കോർ 4-2 എന്നാക്കി. 67-ാം മിനിറ്റിൽ തന്റെ രണ്ടാം ഗോൾ നേടിയ റഹീമി അൽ ഐനെ കളിയിൽ നിലനിർത്തി, സ്കോർ 4-3 എന്നായി. 75-ാം മിനിറ്റിൽ അൽ-ദവ്‌സാരി തന്റെ ഹാട്രിക്ക് പൂർത്തിയാക്കി, അൽ-ഹിലാലിന്റെ ലീഡ് 5-3 ആയി ഉയർന്നു.
അലി അൽ ബുലായ്ഹിക്ക് ചുവപ്പ് കാർഡ് ലഭിച്ചതോടെ 82-ാം മിനിറ്റിൽ അൽ-ഹിലാൽ 10 പേരായി ചുരുങ്ങി. സ്റ്റോപ്പേജ് ടൈമിൽ, 90 + 6 ‘മിനിറ്റിൽ പെനാൽറ്റിയോടെ റഹീമി തന്റെ ഹാട്രിക് പൂർത്തിയാക്കി, എന്നാൽ പരാജയം ഒഴിവാക്കാൻ അത് പര്യാപ്തമായില്ല.
