റയൽ മാഡ്രിഡ് വിട്ട ഡിഫൻഡർ നാച്ചോ ഫെർണാണ്ടസ് ഇനി സൗദി അറേബ്യയിൽ. താരം സൗദി ക്ലബായ അൽ ക്വദ്സിയിൽ കരാർ ഒപ്പുവെച്ചതായി ഔദ്യോഗികമായി പ്രഖ്യാപനം വന്നു. റയൽ മാഡ്രിഡിന് എതിരെ കളിക്കാൻ താല്പര്യം ഇല്ലാത്തത് കൊണ്ടാണ് യൂറോപ്പിൽ നിൽക്കാതെ താൻ സൗദി അറേബ്യയിലേക്ക് പോകുന്നത് എന്ന് നാചോ കരാർ ഒപ്പുവെച്ച ശേഷം പറഞ്ഞു.
റയൽ മാഡ്രിഡ് വിടുക തനിക്ക് ഏറെ പ്രയാസമുള്ള കാര്യമായിരുന്നു. ഇതുവരെ റയലിൽ താൻ നേടിയതിൽ സന്തോഷവാൻ ആണ്. റയലിനൊപ്പം ഒരു കിരീടവും തനിക്ക് നേടാൻ ബാക്കിയില്ല. നാചോ പറഞ്ഞു.
രണ്ട് വർഷത്തെ കരാർ ആണ് നാച്ചോ ക്വദ്സയിൽ ഒപ്പുവെച്ചത്. നേരത്തെ അൽ ഇത്തിഹാദിന്റെ ഓഫർ നാചോക്ക് മുന്നിൽ ഉണ്ടായിരുന്നു. ആ ഓഫർ നിരസിച്ചാണ് നാച്ചോ ക്വദ്സയിൽ കരാർ ഒപ്പുവെച്ചത്. നാചോ അവസാന 23 വർഷമായി റയൽ മാഡ്രിഡിനൊപ്പം ഉണ്ടായിരുന്നു.
23 വർഷം മുമ്പ് റയൽ മാഡ്രിഡിന്റെ അക്കാദമിയിൽ ചേർന്ന നാച്ചോ 2011 ഏപ്രിലിൽ വലൻസിയയ്ക്കെതിരായ മത്സരത്തിൽ ആയിരുന്നു റയലിനായി സീനിയർ അരങ്ങേറ്റം നടത്തിയത്. നാച്ചോ റയൽ മാഡ്രിഡിനായി ഇതുവരെ 400ൽ അധികം കളികൾ കളിച്ചിട്ടുണ്ട്. റയലിനൊപ്പം ആറ് ചാമ്പ്യൻസ് ലീഗ് അടക്കം 25 ട്രോഫികളും താരം നേടി. 33-കാരൻ ചാമ്പ്യൻസ് ലീഗിൽ മാത്രം ഇതുവരെ റയലിനായി 60ൽ അധികം മത്സരങ്ങൾ കളിച്ചിട്ടുണ്ട്.
