ഒഡീഷ: സൂപ്പർ കപ്പ് ഫുട്ബോൾ ടൂർണമെന്റിൽ മുംബൈ സിറ്റി എഫ്സി ക്വാർട്ടർ ഫൈനലിൽ പ്രവേശിച്ചു. ഇന്ന് ഒഡീഷയിൽ നടന്ന മത്സരത്തിൽ എതിരില്ലാത്ത നാല് ഗോളുകൾക്ക് അവർ ചെന്നൈയിൻ എഫ്സിയെ തകർത്തു.
ആദ്യ പകുതിയുടെ 42-ാം മിനിറ്റിൽ മൗറീഷ്യോ കരയലിസാണ് മുംബൈ സിറ്റിക്കായി ആദ്യ ഗോൾ നേടിയത്. രണ്ടാം പകുതിയിൽ 63-ാം മിനിറ്റിൽ ലാലിയൻസുവാല ചാങ്തെ കരയലിസിന്റെ അസിസ്റ്റിൽ ലീഡ് ഇരട്ടിയാക്കി.
85-ാം മിനിറ്റിൽ ചാങ്തെ തന്റെ രണ്ടാം ഗോളും നേടി മുംബൈയുടെ വിജയം ഉറപ്പിച്ചു. മത്സരത്തിന്റെ അധിക സമയത്ത് (90+1) ബിപിൻ സിംഗ് ഒരു ഗോൾ കൂടി നേടിയതോടെ മുംബൈ സിറ്റിയുടെ വിജയം 4-0 എന്ന നിലയിൽ പൂർത്തിയായി.
ഇതോടെ മുംബൈ സിറ്റി ക്വാർട്ടർ ഫൈനലിൽ പ്രവേശിച്ചു.
അവർ ഇനി ക്വാർട്ടർ ഫൈനലിൽ ഐ-ലീഗ് ചാമ്പ്യന്മാരായ ഇന്റർ കാശിയെ നേരിടും. ഇന്ന് നടന്ന മത്സരത്തിൽ ബെംഗളൂരു എഫ്സിയെ തോൽപ്പിച്ചാണ് ഇന്റർ കാശി ക്വാർട്ടർ ഫൈനലിൽ എത്തിയത്.
