റയൽ മാഡ്രിഡ് താരം കിലിയൻ എംബപ്പെ പരിക്ക് മാറി ഈ ശനിയാഴ്ച നടക്കുന്ന ബാഴ്സലോണക്കെതിരായ കോപ്പാ ഡെൽ റേ ഫൈനലിൽ കളിക്കാൻ ലക്ഷ്യമിടുന്നു എന്ന് പരിശീലകൻ കാർലോ അൻസലോട്ടി സ്ഥിരീകരിച്ചു.
കഴിഞ്ഞയാഴ്ച ആഴ്സണലിനോട് നടന്ന ചാമ്പ്യൻസ് ലീഗ് മത്സരത്തിനിടെ പരിക്കേറ്റ് പുറത്തായ എംബാപ്പെ ഞായറാഴ്ച അത്‌ലറ്റിക് ബിൽബാവോക്കെതിരായ റയൽ മാഡ്രിഡിന്റെ ലാ ലിഗ മത്സരത്തിൽ കളിച്ചിരുന്നില്ല.
ബുധനാഴ്ച ഗെറ്റാഫെക്കെതിരായ മത്സരത്തിലും അദ്ദേഹത്തിന് കളിക്കാൻ കഴിയില്ല. എന്നിരുന്നാലും, എംബാപ്പെയും സഹതാരമായ ഫെർലാൻഡ് മെൻഡിയും ക്ലാസിക്കോ ഫൈനലിന് മുൻപ് തിരിച്ചെത്തുമെന്ന് പ്രതീക്ഷിക്കുന്നതായി അൻസലോട്ടി മാധ്യമപ്രവർത്തകരോട് പറഞ്ഞു.
“നാളത്തെ മത്സരത്തിന് അവർ തയ്യാറല്ല, പക്ഷേ അവർ വരും ദിവസങ്ങളിൽ പരിശീലനം നടത്തും, ശനിയാഴ്ചത്തെ മത്സരത്തിന് അവർ ലഭ്യമാകുമെന്ന് ഞാൻ വിശ്വസിക്കുന്നു,” അൻസലോട്ടി ചൊവ്വാഴ്ച മാധ്യമങ്ങളോട് പറഞ്ഞു.
