ട്രെബിൾ കിരീടങ്ങൾ എന്ന മാഞ്ചസ്റ്റർ സിറ്റി സ്വപ്നം അവരുടെ കയ്യകലത്തിലേക്ക് ആകുന്നു. ഇന്ന് അവർ എഫ് എ കപ്പ് ഫൈനൽ സ്ഥാനം ഉറപ്പിച്ചിരിക്കുകയാണ്. ഇന്ന് വെംബ്ലിയിൽ ഷെഫീൽഡ് യുണൈറ്റഡിനെ എതിരില്ലാത്ത മൂന്നു ഗോളുകൾക്ക് തോൽപ്പിച്ച് ആണ് സിറ്റി ഫൈനലിലേക്ക് മുന്നേറിയത്. റിയാദ് മഹ്റസ് ഇന്ന് ഹാട്രിക്കുമായി ഗ്വാർഡിയോളയുടെ ടീമിന്റെ വിജയശില്പിയായി.
ഇന്ന് പതിയെ തുടങ്ങിയ മാഞ്ചസ്റ്റർ സിറ്റി 43ആം മിനുട്ടിൽ ഒരു പെനാൾട്ടിയിലൂടെ ആണ് ലീഡ് എടുത്തത്. പെനാൾട്ടി എടുത്ത മഹ്റസ് ലക്ഷ്യം തെറ്റാതെ പന്ത് വലയിൽ എത്തിച്ചു. രണ്ടാം പകുതിയിൽ 61ആം മിനുട്ടിൽ മഹ്റസ് വീണ്ടും സിറ്റിക്കായി ഗോൾ നേടി. 66ആം മിനുട്ടിൽ മഹ്റസ് ഹാട്രിക്കും തികച്ചു. 1958നു ശേഷം എഫ് എ കപ്പ് സെമി ഫൈനലിൽ ഒരു ഹാട്രിക്ക് പിറക്കുന്നത് ഇതാദ്യമാണ്.
നാളെ നടക്കുന്ന രണ്ടാം സെമിയിൽ ബ്രൈറ്റണും മാഞ്ചസ്റ്റർ യുണൈറ്റഡും നേർക്കുനേർ വരും. ഈ മത്സരത്തിലെ വിജയികളെ ആകും മാഞ്ചസ്റ്റർ സിറ്റി ഫൈനലിൽ നേരിടുക.
