ആൻഫീൽഡിൽ നടന്ന മത്സരത്തിൽ നോട്ടിംഗ്ഹാം ഫോറസ്റ്റ് ലിവർപൂളിനെതിരെ 3-0 ന്റെ മികച്ച വിജയം നേടി ലീഗ് ചാമ്പ്യന്മാരെ ഞെട്ടിച്ചു. ഇന്ന് ഫോറസ്റ്റ് 33-ാം മിനിറ്റിൽ മുറില്ലോയുടെ കൃത്യമായ ഷോട്ടിലൂടെ ലീഡ് നേടി. ലിവർപൂൾ നിരവധി അവസരങ്ങൾ സൃഷ്ടിച്ചിട്ടും ഈ ഗോളിന് മറുപടി നൽകാൻ ആയില്ല.
രണ്ടാം പകുതിക്ക് തൊട്ടുപിന്നാലെ നെക്കോ വില്യംസിന്റെ അസിസ്റ്റിൽ നിന്ന് നിക്കോളോ സവോണ മികച്ച ഫിനിഷിലൂടെ ഫോറസ്റ്റിന്റെ ലീഡ് ഇരട്ടിയാക്കി, ഇത് ലിവർപൂളിനെ കടുത്ത സമ്മർദ്ദത്തിലാക്കി.
മുഹമ്മദ് സല, അലക്സിസ് മാക് അല്ലിസ്റ്റർ, ഡൊമിനിക് സൊബോസ്ലായ് എന്നിവരുടെ നിരവധി ശ്രമങ്ങൾ ഉണ്ടായിട്ടും ലിവർപൂളിന് ഫോറസ്റ്റിന്റെ പ്രതിരോധം ഭേദിക്കാനായില്ല. 78-ാം മിനിറ്റിൽ മോർഗൻ ഗിബ്സ്-വൈറ്റ് ബോക്സിനുള്ളിൽ നിന്ന് ഇടത് കാൽ കൊണ്ട് ഗോൾ നേടി ഫോറസ്റ്റിന്റെ ലീഡ് വീണ്ടും ഉയർത്തുകയും വിജയമുറപ്പിക്കുകയും ചെയ്തു.
ഫെഡറിക്കോ കിയേസ, ആൻഡി റോബർട്ട്സൺ, ഫോർവേഡ് ഹ്യൂഗോ എകിറ്റികെ എന്നിവരെ കളത്തിലിറക്കി ലിവർപൂൾ പരീക്ഷണം നടത്തിയെങ്കിലും ഫോറസ്റ്റിന്റെ ഒതുക്കമുള്ള പ്രതിരോധവും ക്ലിനിക്കൽ ഫിനിഷും കാരണം ലിവർപൂളിന് കാര്യമായൊന്നും ചെയ്യാനായില്ല.
ഈ തോൽവി ലിവർപൂളിനെ ലീഗിൽ പത്താം സ്ഥാനത്ത് നിർത്തുകയാണ്.
