ഇന്ന് സെഗോവിയയിലെ ഒട്ടെറോ ഡി ഹെറെറോസിൽ നടന്ന സ്പെയിൻ പര്യടനത്തിലെ തങ്ങളുടെ രണ്ടാം പരിശീലന മത്സരത്തിൽ അണ്ടർ 18 ലെഗാനസിനെതിരെ ഇന്ത്യ അണ്ടർ 17 ടീം പരാജയപ്പെട്ടു. 2-0 എന്നായിരുന്നു സ്കോർ. ഈ വർഷം ജൂൺ-ജൂലൈ മാസങ്ങളിൽ തായ്ലൻഡിൽ നടക്കുന്ന എഎഫ്സി അണ്ടർ 17 ഏഷ്യൻ കപ്പിന് മുന്നോടിയായി തയ്യാറെടുപ്പ് ആയാണ് ഇന്ത്യ സ്പെയിനിൽ പര്യടനം നടത്തുന്നത്.
നേരത്തെ അത്ലറ്റിക്കോ ഡി മാഡ്രിഡ് അണ്ടർ 17 ടീമിനെതിരെ ഒരു പരിശീലന മത്സരം കളിക്കുകയും ആ മത്സരത്തിൽ ഇന്ത്യ 4-1 ന് വിജയിക്കുകയും ചെയ്തു. 35ആം മിനുട്ടിൽ പ്രിസോയുൻ 68-ാം മിനിറ്റിൽ ഗോൺസാലോയും ആണ് ലെഗാനെസിന്റെ ഗോളുകൾ നേടിയത്. ഇനി മൂന്ന് മത്സരങ്ങൾ കൂടെ ഇന്ത്യ സ്പെയിനിൽ കളിക്കും. അത്ലറ്റിക്കോ മാഡ്രിഡ്, റയൽ മാഡ്രിഡ്, ഗെറ്റഫെ എന്നിവരാണ് ഇന്ത്യയുടെ അടുത്ത എതിരാളികൾ.
