ഡ്യൂറണ്ട് കപ്പിൽ കേരള ബ്ലാസ്റ്റേഴ്സ് എഫ് സിക്ക് വൻ വിജയം. ഇന്ന് സി ഐ എസ് എഫിനെ നേരിട്ട കേരള ബ്ലാസ്റ്റേഴ്സ് എതിരില്ലാത്ത ഏഴു ഗോളുകൾക്ക് ആണ് ഇന്ന് വിജയിച്ചത്. ഇന്ന് ആദ്യ പകുതിയിൽ തന്നെ കേരള ബ്ലാസ്റ്റേഴ്സ് ആറ് ഗോളുകൾക്ക് മുന്നിൽ നിന്നിരുന്നു. നേരത്തെ ഗ്രൂപ്പിലെ ആദ്യ മത്സരത്തിൽ കേരള ബ്ലാസ്റ്റേഴ്സ് മുംബൈ സിറ്റിയെ എതിരില്ലാത്ത എട്ടു ഗോളുകൾക്ക് തോൽപ്പിച്ചിരുന്നു.
ഇന്ന് മത്സരത്തിന്റെ ആറാം മിനുട്ടിൽ തന്നെ കേരള ബ്ലാസ്റ്റേഴ്സ് ലീഡ് എടുത്തു. നോഹയുടെ ഒരു ചിപ് പാസ് ഹെഡ് ചെയ്ത് വലയിൽ എത്തിച്ചായിരുന്നു പെപ്രയുടെ ഗോൾ. ഇതിനു പിന്നാലെ ഒമ്പതാം മിനുട്ടിൽ ഐമന്റെ അസിസ്റ്റിൽ നിന്ന് നോഹ ഗോൾ നേടി കൊണ്ട് ബ്ലാസ്റ്റേഴ്സ് ലീഡ് ഇരട്ടിയാക്കി.
16ആം മിനുറ്റിൽ ഐമൻ ബ്ലാസ്റ്റേഴ്സിന്റെ മൂന്നാം ഗോൾ നൽകി. ഐമന്റെ ഗോൾ പെപ്ര ആയിരുന്നു ഒരുക്കിയത്. ഇരുപതാം മിനുട്ടിൽ നോഹ തന്റെ രണ്ടാം ഗോൾ കണ്ടെത്തി. 25ആം മിനുട്ടിൽ നവോചയുടെ വക ആയിരുന്നു ബ്ലാസ്റ്റേഴ്സിന്റെ അഞ്ചാം ഗോൾ. ആദ്യ പകുതിക്ക് പിരിയാൻ ഒരു മിനുട്ട് ബാക്കി ഇരിക്കെ അസ്ഹറും ബ്ലാസ്റ്റേഴ്സിനായി ഗോൾ നേടി. ഐമന്റെ അസിസ്റ്റിൽ നിന്നായിരുന്നു സഹോദരന്റെ ഗോൾ.
രണ്ടാം പകുതിയിൽ കേരള ബ്ലാസ്റ്റേഴ്സ് കൂടുതൽ ഗോളിനായി ശ്രമിച്ചു. 88ആം മിനുട്ടിൽ ഒരു പെനാൾട്ടി കിട്ടി എങ്കിലും നോഹക്ക് ലക്ഷ്യത്തിൽ എത്തിക്കാൻ ആയില്ല. എന്നാൽ പെട്ടെന്ന് തന്നെ അതിന് നോഹ തന്റെ മൂന്നാം ഗോളിലൂടെ പ്രായശ്ചിത്തം ചെയ്തു. നോഹയുടെ ഈ ഡ്യൂറണ്ട് കപ്പിലെ രണ്ടാം ഹാട്രിക്ക് ആണിത്. ഇന്നത്തെ വിജയിച്ചതോടെ ഗ്രൂപ്പ് ചാമ്പ്യന്മാരായി ബ്ലാസ്റ്റേഴ്സ് നോക്കൗട്ട് റൗണ്ട് ഉറപ്പിച്ചു.
