മലയാളി താരം വി പി സുഹൈർ ജംഷദ്പൂർ എഫ് സിയിലേക്ക്. ഈസ്റ്റ് ബംഗാളിൽ നിന്ന് ലോൺ അടിസ്ഥാനത്തിൽ ആണ് സുഹൈർ ജംഷദ്പൂരിലേക്ക് പോകുന്നത്. ഖാലിദ് ജമീലിന്റെ സാന്നിദ്ധ്യമാണ് താരത്തെ ജംഷദ്പൂരിൽ എത്തിക്കുന്നത്. മുമ്പ് നോർത്ത് ഈസ്റ്റിൽ ഇരിക്കെ ഖാലിദ് ജമീലിന് കീഴിൽ മികച്ച പ്രകടനം കാഴ്ചവെക്കാൻ സുഹൈറിനായിരുന്നു.
2022ൽ ആയിരുന്നു നോർത്ത് ഈസ്റ്റ് വിട്ട് സുഹൈർ ഈസ്റ്റ് ബംഗാളിൽ തിരികെയെത്തിയത്. എന്നാൽ നോർത്ത് ഈസ്റ്റിലെ മികവ് ഈസ്റ്റ് ബംഗാളിൽ ആവർത്തിക്കാൻ സുഹൈറിനായിരുന്നില്ല. ഈ സീസണിൽ ഇതുവരെ ആകെ 2 മത്സരങ്ങളിലായി 19 മിനുട്ട് മാത്രമെ ഈസ്റ്റ് ബംഗാളിനായി സുഹൈർ കളത്തിൽ ഇറങ്ങിയിരുന്നുള്ളൂ.
മുമ്പ് രണ്ടു സീസണുകളായി ഗോകുലത്തിന്റെ ജേഴ്സിയിലും സുഹൈർ കളിച്ചിരുന്നു. ഗോകുലത്തിനൊപ്പം കേരള പ്രീമിയർ ലീഗ് കിരീടം നേടിയിട്ടുള്ള സുഹൈർ മുമ്പ് കൊൽക്കത്ത ക്ലബായ യുണൈറ്റഡ് സ്പോർട്സിനു വേണ്ടിയും കളിച്ചിട്ടുണ്ട്.
