ഈസ്റ്റ് ബംഗാളിന്റെ ഗോൾ കീപ്പറായ ശങ്കർ റോയ് ക്ലബിൽ തുടരും. യുവ ഗോൾ കീപ്പറുടെ കരാർ പുതുക്കിയതായി ഈസ്റ്റ് ബംഗാൾ അറിയിച്ചു. കഴിഞ്ഞ സീസണിൽ ലോണടിസ്ഥാനത്തിൽ ശങ്കർ റോയ് ഹൈദരബാദിനൊപ്പം ഐ എസ് എല്ലിൽ കളിച്ചിരുന്നു. വലിയ പ്രതീക്ഷയോടെ ഈസ്റ്റ് ബംഗാളിൽ എത്തിയെങ്കിലും താരത്തിന് ഇതുവരെ അധികം അവസരം ലഭിച്ചിട്ടില്ല.
രണ്ടു സീസൺ മുമ്പ് മോഹൻ ബഗാനെ ഐലീഗ് കിരീടത്തിലേക്ക് നയിക്കുന്നതിൽ പ്രധാന പങ്കുവഹിച്ച ഗോൾ കീപ്പർ ആയിരുന്നു ശങ്കർ റോയി. ആ സീസണിൽ മോഹൻ ബഗാനു വേണ്ടി 14 മത്സരങ്ങൾ കളിച്ച ശങ്കർ റോയ് ആകെ 9 ഗോളുകൾ മാത്രമാണ് വഴങ്ങിയത്. ഏഴു ക്ലീൻ ഷീറ്റ് താരം ആ ഐ ലീഗിൽ സ്വന്തമാക്കിയിരുന്നു. മൊഹമ്മദൻസിലൂടെ വളർന്നു വന്ന താരമാണ്. മുമ്പ് സന്തോഷ് ട്രോഫിയിൽ ബംഗാൾ കിരീടം നേടിയപ്പോൾ ഗോൾ വല കാത്തതും ശങ്കർ റോയ് ആയിരുന്നു.
