ഇന്ത്യൻ സൂപ്പർ ലീഗ് ഐ എസ് എൽ ഷീൽഡിലേക്ക് അടുത്ത് മുംബൈ സിറ്റി. ഇന്ന് ഒഡീഷ് എഫ്സിയെ നേരിട്ട മുംബൈ സിറ്റി ഒന്നിനെതിരെ 2 ഗോളുകൾക്ക് വിജയിച്ചു. ഈ പരാജയത്തോടെ ഒഡീഷയുടെ ഷീൽഡ് പ്രതീക്ഷകൾ അവസാനിച്ചു.
22ആം മിനിറ്റിൽ ജോർഗെ പെരേര ഡിയസിലൂടെ ആണ് മുംബൈ സിറ്റി ലീഡ് എടുത്തത്. 25ആം മിനിറ്റിൽ ഡിയേഗോ മൗറീസിയോ ഒഡിഷയ്ക്ക് സമനില നൽകി. ആദ്യ പകുതിയിൽ കളി അവസാനിക്കുമ്പോൾ 1-1 എന്ന നിലയിലായിരുന്നു.
രണ്ടാം പകുതിയിൽ 61ആം മിനിറ്റിൽ ചാങ്തെ നേടിയ ഗോളിൽ മുംബൈ സിറ്റി വിജയം ഉറപ്പിച്ചു. ഈ വിജയത്തോടെ 21 മത്സരങ്ങളിൽ നിന്നും മുംബൈ സിറ്റിക്ക് 47 പോയിൻറ് ആയി. 20 മത്സരങ്ങളിൽ നിന്ന് 42 പോയിന്റ് ഉള്ള മോഹൻ ബഗാനാണ് രണ്ടാം സ്ഥാനത്തുള്ളത്. മോഹൻ ബഗാന് രണ്ട് മത്സരങ്ങളും മുംബൈ സിറ്റിക്ക് ഒരു മത്സരവും ആണ് ബാക്കിയുള്ളത്.
മോഹൻ ബഗാൻ അടുത്ത മത്സരത്തിൽ ബംഗളൂരുവിനെ നേരിടും. അത് കഴിഞ്ഞ് മുംബൈ സിറ്റിയും മോഹൻ ബഗാനും തമ്മിലാണ് ഏറ്റുമുട്ടുന്നത്. അടുത്ത മത്സരം ബംഗളൂരുമായി മോഹൻ ബഗാൻ വിജയിക്കുകയാണെങ്കിൽ ഷീൽഡ് ആർക്ക് എന്ന് തീരുമാനിക്കുക ലീഗിലെ അവസാന മത്സരത്തിൽ മുംബൈ സിറ്റിയും മോഹൻ ബഗാനും ഏറ്റുമുട്ടുമ്പോൾ ആയിരിക്കും.