ഇന്ന് കൊച്ചിയിൽ നടന്ന കേരള ബ്ലാസ്റ്റേഴ്സ് എഫ് സി ഗോവ പോരാട്ടത്തിൽ കേരള ബ്ലാസ്റ്റേഴ്സിന് നിരാശ. സ്വന്തം ഹോം ഗ്രൗണ്ടിൽ മറുപടിയില്ലാത്ത ഒരു ഗോളിനാണ് കേരള ബ്ലാസ്റ്റേഴ്സ് പരാജയപ്പെട്ടത്.
ഇന്ന് തുടക്കം മുതൽ താളം കണ്ടെത്താൻ പ്രയാസപ്പെടുന്ന കേരള ബ്ലാസ്റ്റേഴ്സിനെ ആണ് കണ്ടത്. ആദ്യ പകുതിയിൽ കൂടുതൽ നല്ല അവസരങ്ങൾ സൃഷ്ടിച്ചത് ഗോവ ആയിരുന്നു. അവസാനം 40ആം മിനുട്ടിൽ ബോറിസ് സിംഗിലൂടെ ഗോവ ലീഡ് എടുത്തു. കേരള ബ്ലാസ്റ്റേഴ്സ് ഗോൾ കീപ്പർ സച്ചിൻ സുരേഷ് തന്റെ നിയർ പോസ്റ്റ് സംരക്ഷിക്കാൻ മറന്നത് ബോറിസ് മുതലെടുക്കുക ആയിരുന്നു.
രണ്ടാം പകുതിയിൽ കേരള ബ്ലാസ്റ്റേഴ്സ് അറ്റാക്കിംഗ് മാറ്റങ്ങൾ വരുത്തിയിട്ടും ഗോൾ അകന്നു നിന്നു. നിരവധി അവസരങ്ങൾ വന്നിട്ടും ഒന്ന് പോലും ലക്ഷ്യത്തിൽ എത്തിക്കാൻ ടീമിനായില്ല.
10 മത്സരങ്ങൾ കഴിഞ്ഞപ്പോൾ 11 പോയിന്റു മാത്രമുള്ള കേരള ബ്ലാസ്റ്റേഴ്സ് ഇപ്പോൾ 9ആം സ്ഥാനത്താണ്. ഗോവ 15 പോയിന്റുമായി അഞ്ചാമതും നിൽക്കുന്നു.
