ബുധനാഴ്ച കോഴിക്കോട് ഇഎംഎസ് കോർപ്പറേഷൻ സ്റ്റേഡിയത്തിൽ നടക്കുന്ന ഹീറോ ക്ലബ് പ്ലേഓഫിൽ ഹൈദരാബാദ് എഫ്‌സിയും എടികെ മോഹൻ ബഗാനും നേർക്കുനേർ വരും. 2023-24 AFC കപ്പിന്റെ പ്രാഥമിക റൗണ്ടിൽ ഒരു സ്ഥാനം ഉറപ്പിക്കാൻ ആണ് ഇരുവരും പോരാടുന്നത്. ഹൈദരാബാദ് പരിശീലകൻ മനോലോ മാർക്കസിന്റെ ഹൈദരാബാദ് പരിശീലകനായുള്ള അവസാന മത്സരമാകും ഇത്.
എഎഫ്‌സി കപ്പിൽ തുടർച്ചയായി മൂന്നാം തവണയും കളിക്കാനുള്ള ശ്രമത്തിലാണ് എ ടി കെ മോഹൻ ബഗാൻ. അതേസമയം ആദ്യമായി എ എഫ് സി കപ്പിൽ എത്തുക ആണ് ഹൈദരബാദിന്റെ ലക്ഷ്യം. ഹൈദരാബാദ് എഫ്‌സി ഹീറോ ഐ‌എസ്‌എല്ലിൽ രണ്ടാം സ്ഥാനത്ത് ഫിനിഷ് ചെയ്തിരുന്നു. ഐ എസ് എൽ ചാമ്പ്യൻമാരായി മാറിയ എടികെ മോഹൻ ബഗാനോട് സെമിയിൽ തോറ്റായിരുന്നു അവരുടെ ഐ എസ് എൽ ക്യാമ്പയിൻ അവസാനിച്ചത്.
ഇതുവരെ ഇരു ടീമുകളും 10 തവണ പരസ്പരം ഏറ്റുമുട്ടിയിട്ടുണ്ട്. ഹൈദരാബാദ് എഫ്‌സി മൂന്ന് തവണ വിജയിച്ചപ്പോൾ എടികെ മോഹൻ ബഗാൻ 2 തവണ വിജയിച്ചു. അഞ്ച് മത്സരങ്ങൾ സമനിലയിൽ അവസാനിച്ചു. ഇന്ന് രാത്രി 7 മണിക്ക് നടക്കുന്ന മത്സരം സോണി സ്പോർട്സിലും Fancode ആപ്പിലും തത്സമയം കാണാം.
