കൊൽക്കത്ത: ഇന്ത്യൻ സൂപ്പർ ലീഗിന്റെ (ഐഎസ്എൽ) ആവേശകരമായ ഫൈനലിൽ ഇന്ന് മോഹൻ ബഗാൻ സൂപ്പർ ജയന്റ്‌സ് ബംഗളൂരു എഫ്‌സിയെ പരാജയപ്പെടുത്തി കിരീടം ചൂടി. എക്സ്ട്രാ ടൈം വരെ നീണ്ട പോരാട്ടത്തിൽ ഒന്നിനെതിരെ രണ്ട് ഗോളുകൾക്കായിരുന്നു മോഹൻ ബഗാന്റെ തകർപ്പൻ വിജയം.
കൊൽക്കത്തയിലെ നിറഞ്ഞ സ്റ്റേഡിയത്തിൽ നടന്ന ഫൈനലിൽ ആദ്യ പകുതി ഗോൾരഹിതമായിരുന്നു. എന്നാൽ രണ്ടാം പകുതിയുടെ തുടക്കത്തിൽ 49-ാം മിനിറ്റിൽ ഒരു സെൽഫ് ഗോളിലൂടെ ബംഗളൂരു എഫ്‌സി ലീഡ് നേടി. ഈ ലീഡ് 20 മിനിറ്റോളം അവർക്ക് നിലനിർത്താനായി. എന്നാൽ 72-ാം മിനിറ്റിൽ ലഭിച്ച ഒരു പെനാൽറ്റിയിലൂടെ മോഹൻ ബഗാൻ സമനില ഗോൾ നേടി തിരിച്ചുവന്നു. കമ്മിംഗ്സ് ആണ് പെനാൽറ്റി ലക്ഷ്യത്തിൽ എത്തിച്ചത്.
തുടർന്ന് ഇരു ടീമുകളും വിജയ ഗോളിനായി കിണഞ്ഞു പരിശ്രമിച്ചെങ്കിലും നിശ്ചിത 90 മിനിറ്റിൽ ഗോൾ പിറന്നില്ല. ഇതോടെ മത്സരം എക്സ്ട്രാ ടൈമിലേക്ക് നീണ്ടു. എക്സ്ട്രാ ടൈം തുടങ്ങി ആറാം മിനിറ്റിൽ (96-ാം മിനിറ്റ്) മക്ലാരനിലൂടെ മോഹൻ ബഗാൻ ലീഡ് നേടി. ബംഗളൂരു ഗോൾകീപ്പർ ഗുർപ്രീത് സിംഗ് സന്ധുവിൻ്റെ കാലുകൾക്കിടയിലൂടെയുള്ള ഒരു മികച്ച ഫിനിഷിലൂടെയാണ് മക്ലാരൻ ഗോൾ നേടിയത്.
ഈ ഗോൾ മോഹൻ ബഗാന്റെ വിജയം ഉറപ്പിച്ചു. ഈ വിജയത്തോടെ മോഹൻ ബഗാൻ ഈ സീസണിലെ ലീഗ് ഡബിൾ സ്വന്തമാക്കി. അവർ നേരത്തെ ലീഗ് ഷീൽഡും കരസ്ഥമാക്കിയിരുന്നു.
