അസൻസിയോയുടെ ഇരട്ടഗോൾ ബലത്തിൽ റയൽ മാഡ്രിഡ്‌ യുവന്റസിനെ വീഴ്ത്തി

ഇന്ന് പുലർച്ചെ നടന്ന സൗഹൃദ മത്സരത്തിൽ റയൽ മാഡ്രിഡ് യുവന്റസിനെ തോല്പ്പിച്ചു. ഒന്നിനെതിരെ മൂന്ന് ഗോളുകൾക്കായിരുന്നു റയൽ മാഡ്രിഡിന്റെ വിജയം. തുടക്കത്തിൽ ഒരു ഗോളിന് പിറകിൽ പോയെങ്കിലും ശക്തമായി റയൽ തിരിച്ചുവരികയായിരുന്നു. അഞ്ചാം മിനുട്ടിൽ കാർവഹാൽ വഴങ്ങിയ സെൽഫ് ഗോളാണ് റയലിനെ തുടക്കത്തിൽ പ്രതിരോധത്തിൽ ആക്കിയത്.

എന്നാൽ മികച്ച ഫോമിലുള്ള ഗരെത് ബെയ്ല് ആദ്യ പകുതിയിൽ തന്നെ റയലിന്റെ രക്ഷയ്ക്ക് എത്തി. 39ആം മിനുട്ടിൽ യുവതാരം കബയോസിന്റെ അസിസ്റ്റിൽ നിന്നായിരുന്നു ബെയ്ലിന്റെ ഗോൾ. 47ആം മിനുട്ടിൽ ബ്രസീൽ താരം വീൻഷ്യസ് ജൂനിയറിന്റെ ഇടതു വിങ്ങിലെ മികച്ച കുതിപ്പിന് ഒടുവിൽ അസൻസിയോയുടെ ഫിനിഷോടെ റയൽ ലീഡിലും എത്തി. 9മിനുട്ടുകൾക്ക് അപ്പുറം ഒരു ഗോളും കൂടി നേടി അസൻസിയോ മത്സരം റയലിന് സ്വന്തമാക്കി കൊടുക്കുകയും ചെയ്തു.

ഇനി ബുധനാഴ്ച പുലർച്ചെ റോമയ്ക്ക് എതിരെയാണ് റയലിന്റെ മത്സരം.

കൂടുതൽ കായിക വാർത്തകൾക്ക് : www.facebook.com/FanportOfficial