ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ യുണൈറ്റഡിന് മറ്റൊരു നിരാശാജനകമായ ഫലം. ഇന്ന് നടന്ന മത്സരത്തിൽ ബോൺമൗത്തിനെതിരെ അവർ 1-1ന്റെ സമനില വഴങ്ങി. അവസാന അരമണിക്കൂറോളം ബോൺമൗത്ത് പത്ത് പേരുമായി കളിച്ചിട്ടും വിജയം നേടാൻ യുണൈറ്റഡിന് സാധിച്ചില്ല.
മത്സരത്തിന്റെ 23-ാം മിനിറ്റിൽ സെമന്യു നേടിയ ഗോളിലൂടെ ബോൺമൗത്താണ് ആദ്യം ലീഡ് നേടിയത്. പിന്നീട് മാഞ്ചസ്റ്റർ യുണൈറ്റഡിന് കാര്യമായ അവസരങ്ങൾ സൃഷ്ടിക്കാൻ പോലും കഴിഞ്ഞില്ല എന്നത് അവരുടെ ദയനീയ അവസ്ഥ വെളിവാക്കുന്നു. അവസാന അഞ്ച് പ്രീമിയർ ലീഗ് മത്സരങ്ങളിൽ നിന്ന് വെറും രണ്ട് ഗോളുകൾ മാത്രമാണ് അവർക്ക് നേടാനായത്. ഈ കാലയളവിൽ അവർക്ക് നേടാനായത് വെറും രണ്ട് പോയിന്റുകൾ മാത്രമാണ്.
മത്സരത്തിന്റെ 70-ാം മിനിറ്റിൽ ബോൺമൗത്ത് താരം എവാനിൽസൺ ചുവപ്പ് കാർഡ് കണ്ട് പുറത്തായതോടെ യുണൈറ്റഡ് മത്സരത്തിലേക്ക് തിരിച്ചുവരുമെന്ന് പ്രതീക്ഷിച്ചെങ്കിലും കാര്യമായ മുന്നേറ്റങ്ങൾ നടത്താൻ അവർക്ക് കഴിഞ്ഞില്ല. ഒടുവിൽ, കളിയുടെ 97-ാം മിനിറ്റിൽ ഹൊയ്ലുണ്ടിലൂടെ മാഞ്ചസ്റ്റർ യുണൈറ്റഡ് ഒരു സമനില ഗോൾ നേടുകയായിരുന്നു.
ഈ സമനിലയോടെ ബോൺമൗത്ത് 50 പോയിന്റുമായി പത്താം സ്ഥാനത്ത് നിൽക്കുന്നു. അതേസമയം, 39 പോയിന്റുകൾ മാത്രമുള്ള മാഞ്ചസ്റ്റർ യുണൈറ്റഡ് പതിനാലാം സ്ഥാനത്തേക്ക് പിന്തള്ളപ്പെട്ടു.
