28.01.2025, കോഴിക്കോട്: ഐ ലീഗിൽ ജയം തുടരാൻ ഗോകുലം കേരള എഫ് സി സ്വന്തം തട്ടകമായ കോഴിക്കോട് കോർപറേഷൻ സ്റ്റേഡിയത്തിൽ ഇന്ന് (29-1-25) കളത്തിലിറങ്ങുന്നു. എതിരാളികൾ എസ് സി ബെംഗളൂരു ആണ്. അവസാന മത്സരത്തിൽ ഇന്റർ കാശിയെ 6-2ന് തോൽപ്പിച്ചതിന്റെ ആത്മവിശ്വാസത്തിലാണ് മലബാറിയൻസ് ഇന്ന് ഇറങ്ങുന്നത്.
നിലവിൽ പത്ത് മത്സരം പൂർത്തിയാക്കിയ ഗോകുലം പട്ടികയിൽ നാലാം സ്ഥാനത്തുണ്ട്. ഇനിയുള്ള മത്സരം ജയിക്കുകയാണെങ്കിൽ പട്ടികയിൽ നേട്ടമുണ്ടാക്കാൻ ഗോകുലം കേരളക്ക് കഴിയും. നാംധാരിയോട് രണ്ട് ഗോളിന് തോറ്റ ഗോകുലം തൊട്ടടുത്ത മത്സരത്തിൽ ശക്തരായ ഇന്റർ കാശിയെയായിരുന്നു വീഴ്ത്തിയത്. ഇത് ടീമിന്റെ ആത്മവിശ്വാസം വർധിപ്പിച്ചിട്ടുണ്ട്.
പുതിയ വിദേശതാരം സിനിസ സ്റ്റാനിസാവിച്ചിന്റെ വരവ് ടീമിന് കരുത്ത് പകർന്നിട്ടുണ്ട്. താരം എത്തിയതോടെ ടീമിന്റെ ഗോൾ ക്ഷാമം മാറിയിട്ടുണ്ട്. സീസണിലെ ആദ്യ മൂന്ന് മത്സരത്തിൽ ഒരു ഗോൾ പോലും നേടാതിരുന്ന ഗോകുലം അവസാന നാലു മത്സരത്തിൽ മത്രം പന്ത്രണ്ട് ഗോളുകളായിരുന്നു എതിർ പോസ്റ്റിൽ നിക്ഷേപിച്ചത്. അവസാന നാലു മത്സരത്തിൽ നാലു ഗോളുകൾ വഴങ്ങുകയും ചെയ്തു. സീസണിൽ പത്ത് മത്സരം പൂർത്തിയാക്കിയ ഗോകുലം രണ്ട് മത്സരത്തിൽ തോറ്റിട്ടുണ്ട്. നാലു മത്സരത്തിൽ ജയിക്കുകയും നാല് മത്സരം സമനിലയിൽ കലാശിക്കുകയും ചെയ്തു.
പട്ടികയിൽ അവസാന സ്ഥാനത്തുള്ള എസ്.സി ബംഗളുരുവിനെയാണ് ഗോകുലം നേരിടുന്നത്. പത്ത് മത്സരം കളിച്ച ബംഗളൂരു രണ്ട് മത്സരത്തിൽ മാത്രമാണ് ജയിച്ചത്. അതിനാൽ എതിരാളിയെ തോൽപ്പിക്കാൻ കഴിയുമെന്ന ആത്മവിശ്വാസത്തിൽ തന്നെയാണ് മലബാറിയൻസ്.
‘
രാത്രി ഏഴിനാണ് മത്സരം. ടിക്കറ്റുകൾ സ്റ്റേഡിയത്തിൽ നിന്നും, ഗോകുലം കേരളം എഫ് സി ഒഫീഷ്യൽ വെബ്സൈറ്റിൽ നിന്നും വാങ്ങാവുന്നതാണ് . മത്സരം വീക്ഷിക്കാൻ സ്ത്രീകൾക്ക് സൗജന്യമായി സ്റ്റേഡിയത്തിൽ പ്രവേശിക്കാനാകും.
