ബാഴ്സലോണ: പരിക്കിനെ തുടർന്ന് ചികിത്സയിലായിരുന്ന ബാഴ്സലോണയുടെ മധ്യനിര താരം ഫ്രെങ്കി ഡി യോംഗ് കളിക്കളത്തിലേക്ക് മടങ്ങിയെത്തുന്നു. ചാമ്പ്യൻസ് ലീഗ് പോരാട്ടത്തിൽ ന്യൂകാസിൽ യുണൈറ്റഡിനെതിരെയുള്ള മത്സരത്തിൽ ഡി യോംഗ് ടീമിനൊപ്പം ചേരും. കഴിഞ്ഞ ആഴ്ച നെതർലാൻഡ്സ്-പോളണ്ട് മത്സരത്തിനിടെയാണ് താരത്തിന് പരിക്കേറ്റത്. തുടർന്ന് വലൻസിയക്കെതിരെയുള്ള ലീഗ് മത്സരത്തിൽ നിന്ന് ഡി ജോംഗ് വിട്ടുനിന്നിരുന്നു. നിലവിൽ താരം ടീമിനൊപ്പം പരിശീലനം ആരംഭിച്ചു.
സെന്റ് ജെയിംസ് പാർക്കിൽ നടക്കുന്ന മത്സരത്തിൽ ഡി യോംഗിന്റെ പരിചയസമ്പത്ത് നിർണായകമാകും. ഡി ജോംഗിന്റെ അഭാവത്തിൽ ബാഴ്സലോണയുടെ മാർക്ക് കാസഡോയും പെഡ്രിയും മികച്ച പ്രകടനമാണ് പുറത്തെടുത്തത്. പരിശീലകൻ ഹാൻസി ഫ്ലിക്കിന് മധ്യനിരയിൽ കൂടുതൽ സാധ്യതകൾ ലഭ്യമാകുന്നതിനൊപ്പം ചാമ്പ്യൻസ് ലീഗ് ക്യാമ്പയിന് മികച്ച തുടക്കം നേടാൻ ഡി യോംഗിന്റെ തിരിച്ചുവരവ് ടീമിന് കൂടുതൽ കരുത്ത് നൽകും.
