ജനുവരി ട്രാൻസ്ഫർ വിൻഡോ അവസാനിക്കാൻ ദിവസങ്ങൾ മാത്രം ബാക്കിനിൽക്കെ ക്രിസ്റ്റൽ പാലസിന്റെ ഫ്രഞ്ച് സ്ട്രൈക്കർ ജീൻ-ഫിലിപ്പ് മറ്റേറ്റയെ സ്വന്തമാക്കാൻ നോട്ടിംഗ്ഹാം ഫോറസ്റ്റ് 35 മില്യൺ പൗണ്ടിന്റെ വമ്പൻ ഓഫർ മുന്നോട്ടുവെച്ചു. 28-കാരനായ താരം വ്യക്തിപരമായ നിബന്ധനകളിൽ ഫോറസ്റ്റുമായി ധാരണയിലെത്തിയതായാണ് റിപ്പോർട്ടുകൾ സൂചിപ്പിക്കുന്നത്.
എന്നാൽ മറ്റേറ്റയെ വിട്ടുനൽകാൻ 40 മില്യൺ പൗണ്ടും ഒപ്പം മറ്റ് ആനുകൂല്യങ്ങളുമാണ് പാലസ് ആവശ്യപ്പെടുന്നത്. കൂടാതെ മറ്റേറ്റയ്ക്ക് പകരം മറ്റൊരു താരത്തെ കണ്ടെത്താതെ താരത്തെ റിലീസ് ചെയ്യില്ലെന്ന നിലപാടിലാണ് പാലസ് മാനേജ്മെന്റ്. വോൾവ്സിന്റെ യോർഗൻ സ്ട്രാൻഡ് ലാർസനെയാണ് പകരക്കാരനായി പാലസ് ലക്ഷ്യമിടുന്നത്. ക്യാപ്റ്റൻ മാർക്ക് ഗുഹിയെ മാഞ്ചസ്റ്റർ സിറ്റിക്ക് വിറ്റതും പരിശീലകൻ ഒലിവർ ഗ്ലാസ്നർ ഉടൻ പടിയിറങ്ങുന്നതും പാലസിനെ നിലവിൽ പ്രതിസന്ധിയിലാക്കിയിട്ടുണ്ട്.
തങ്ങളുടെ പ്രധാന സ്ട്രൈക്കറായ ക്രിസ് വുഡ് മുട്ടിനേറ്റ പരിക്കിനെത്തുടർന്ന് പുറത്തായതോടെയാണ് ഫോറസ്റ്റ് പുതിയ മുന്നേറ്റ നിരക്കാരനായി മറ്റേറ്റയെ സമീപിച്ചത്. ഈ സീസണിൽ ലീഗിൽ ഏറ്റവും കുറവ് ഗോളുകൾ നേടിയ രണ്ടാമത്തെ ടീമായ ഫോറസ്റ്റിന് മറ്റേറ്റയുടെ സാന്നിധ്യം വലിയ കരുത്താകുമെന്നാണ് വിലയിരുത്തപ്പെടുന്നത്. കഴിഞ്ഞ ദിവസം ബ്രെന്റ്ഫോർഡിനെ പരാജയപ്പെടുത്തിയെങ്കിലും പ്രീമിയർ ലീഗിൽ നിലനിൽപ്പിനായി പൊരുതുന്ന ഫോറസ്റ്റിന് ആക്രമണനിര ശക്തിപ്പെടുത്തേണ്ടത് അത്യാവശ്യമാണ്.
അതേസമയം കൃത്യമായ പകരക്കാരനില്ലാതെ മറ്റേറ്റയെ വിടില്ലെന്ന് പാലസ് പരിശീലകൻ ഗ്ലാസ്നർ ആവർത്തിച്ചു വ്യക്തമാക്കിയിട്ടുണ്ട്.
