ഡ്യൂറന്റ് കപ്പ് ഗ്രൂപ്പ് എയിൽ വിജയം തുടർന്ന് മോഹൻ ബഗാൻ. ഇന്ന് നടന്ന മത്സരത്തിൽ ഐ ലീഗ് ജേതാക്കളായ പഞ്ചാബ് എഫ്സിയെ എതിരില്ലാത്ത രണ്ടു ഗോളുകൾക്ക് വീഴ്ത്തി കൊണ്ട് ബഗാൻ അടുത്ത ഘട്ടത്തിലേക്ക് കൂടുതൽ അടുത്തു. ആദ്യ പകുതിയിൽ മെൽറോയ് അലീസിയുടെ സെൽഫ് ഗോളും രണ്ടാം പകുതിയിലെ ഹ്യൂഗോ ബൊമസിന്റെ ഗോളുമാണ് മത്സരത്തിന്റെ വിധി നിശ്ചയിച്ചത്.
ബഗാന്റെ അക്രമണത്തോടെ തുടങ്ങിയ മത്സരത്തിൽ ഇടക്ക് പഞ്ചാബും ശ്രമങ്ങൾ നടത്തി. പത്താം മിനിറ്റിൽ ബഗാൻ താരം അഭിഷേകിന്റെ ഷോട്ട് പോസ്റ്റിന് മുകളിലൂടെ കടന്ന് പോയി. പഞ്ചാബ് പ്രതിരോധം പരമാവധി ഉറച്ചു നിന്നു. 18ആം മിനിറ്റിൽ ഗ്ലെൻ മർട്ടി മാർട്ടിനസിന് ലഭിച്ച അവസരവും ലക്ഷ്യത്തിൽ നിന്നും അകന്ന് പോയി. 23 ആം മിനിറ്റിൽ ഗോൾ എത്തി. എതിർ പ്രതിരോധത്തെ ഡ്രിബിൾ ചെയ്തു കയറിയ ശേഷം മൻവീർ തൊടുത്ത ഷോട്ട് അസീസിയുടെ ദേഹത്ത് തട്ടി പോസ്റ്റിലേക്ക് കയറുകയായിരുന്നു. പഞ്ചാബ് താരം ലുക്കാ മെയ്ഖന്റെ ശ്രമങ്ങളും ബഗാൻ പ്രതിരോധം തടഞ്ഞു.
രണ്ടാം പകുതിയുടെ തുടക്കത്തിൽ തന്നെ വീണ്ടും ഗോൾ പിറന്നു. 49ആം മിനിറ്റിൽ ഹ്യൂഗോ ബോമസ് ആണ് വല കുലുക്കിയത്. ലുക്കാ മേയ്ഖന്റെ ബോക്സിനുള്ളിൽ നിന്നുള്ള തകർപ്പൻ ഒരു ഷോട്ട് വിശാൽ ഖേയ്ത് അതി മനോഹരമായിൽ സേവ് ചെയ്തു. രഞ്ജീത് പന്ദ്രയുടെ നീക്കം തടഞ്ഞ് കൊണ്ട് അൻവർ അലിയും ടീമിന്റെ രക്ഷക്കെത്തി. അവസാന നിമിഷങ്ങളിൽ പഞ്ചാബ് പരമാവധി ഗോൾ തിരിച്ചടിക്കാൻ ശ്രമിച്ചെങ്കിലും മോഹൻ ബഗാൻ വഴങ്ങിയില്ല.