ഡ്യൂറണ്ട് കപ്പ് ഇന്ന് ആരംഭിക്കും. ഇന്ത്യൻ ഫുട്ബോൾ 2022-23 സീസണിലെ ആദ്യ ദേശീയ ടൂർണമെന്റ് ഇന്ന് തുടങ്ങും. ഇന്ന് മൊഹമ്മദൻ സ്പോർടിങും ഡ്യൂറണ്ട് കപ്പിലെ നിലവിലെ ചാമ്പ്യന്മാരായ എഫ് സി ഗോവയും തമ്മിൽ നടക്കുന്ന മത്സരത്തോടെയാകും ടൂർണമെന്റ് ആരംഭിക്കുന്നത്. കൊൽക്കത്തയിൽ നടക്കുന്ന മത്സരം രാത്രി 7 മണിക്കാണ് ആരംഭിക്കുക. കളി തത്സമയം സ്പോർട്സ് 18ലും വൂട് ആപ്പ് വഴിയും ജിയോ ടിവി വഴിയും കാണാൻ ആകും.
എഫ് സി ഗോവ ടീമിൽ മലയാളികളായി മുഹമ്മദ് നെമിലും സൽമാൻ ഫാരിസും ഉണ്ട്. മൊഹമ്മദൻ സ്ക്വാഡിൽ മലയാളി താരം ഫസലു റഹ്മാനും ക്രിസ്റ്റി ഡേവിസും ഉണ്ട്.
കേരള ബ്ലാസ്റ്റേഴ്സിന്റെ ആദ്യ മത്സരം ഓഗസ്റ്റ് 19നാണ്. ആദ്യ മത്സരത്തിൽ ഐലീഗ് ക്ലബായ സുദേവയെ ആകും കേരള ബ്ലാസ്റ്റേഴ്സ് നേരിടുക.
ഒരു ഗ്രൂപ്പിൽ അഞ്ച് ടീമുകൾ ഉൾപ്പെട്ട് കൊണ്ട് നാലു ഗ്രൂപ്പുകൾ ആണ് ഡ്യൂറണ്ട് കപ്പിൽ ഇത്തവണ ഉള്ളത്. 20 ടീമുകൾ ടൂർണമെന്റിൽ കളിക്കുന്നുണ്ട്. മുൻ ഡ്യൂറണ്ട് കപ്പ് ചാമ്പ്യന്മാരും ഇപ്പോഴത്തെ ഐ ലീഗ് ചാമ്പ്യന്മാരും ആയ ഗോകുലം കേരള ടൂർണമെന്റിൽ ഇല്ല.
കേരള ബ്ലാസ്റ്റേഴ്സ് ഗ്രൂപ്പ് ഡിയിൽ ആണ്. കേരള ബ്ലാസ്റ്റേഴ്സിനൊപ്പം ഐ എസ് എൽ ക്ലബുകളായ ഒഡീഷ, നോർത്ത് ഈസ്റ്റ് എന്നിവരും ഉണ്ട്. കൂടാതെ ഐലീഗ് ക്ലബായ സുദേവ, ഇന്ത്യൻ ആർമി ഗ്രീൻ എന്നിവരും ഈ ഗ്രൂപ്പിൽ ഉണ്ട്.
കൊൽക്കത്ത, ഇംഫാൽ, ഗുവാഹത്തി എന്നിവിടങ്ങളാകും ഡ്യൂറണ്ട് കപ്പിന് വേദിയാവുക. 11 ഐ എസ് എൽ ക്ലബുകളും ആദ്യമായി ഡ്യൂറണ്ട് കപ്പിന്റെ ഭാഗമാകുന്നു എന്ന പ്രത്യേകതയും ഈ എഡിഷന് ഉണ്ട്. കഴിഞ്ഞ തവണ ആറ് ഐ എസ് എൽ ക്ലബുകൾ മാത്രമെ പങ്കെടുത്തിരുന്നുള്ളൂ.
ഗ്രൂപ്പുകൾ;
ഗ്രൂപ്പ് എ: ബെംഗളൂരു എഫ് സി, എഫ് സി ഗോവ, ജംഷദ്പൂർ, മൊഹമ്മദൻസ്, ഇന്ത്യൻ എയർ ഫോഴ്സ്
ഗ്രൂപ്പ് ബി; എ ടി കെ മോഹൻ ബഗാൻ, ഈസ്റ്റ് ബംഗാൾ, ഇന്ത്യൻ നേവി, മുംബൈ സിറ്റി, രാജസ്ഥാൻ യുണൈറ്റഡ്
ഗ്രൂപ്പ് സി; ട്രാവു, ചെന്നൈയിൻ, ഹൈദരാബാദ്, നെരോക, ഇന്ത്യൻ ആർമി റെഡ്
ഗ്രൂപ്പ് ഡി; കേരള ബ്ലാസ്റ്റേഴ്സ്, നോർത്ത് ഈസ്റ്റ്, ഒഡീഷ, സുദേവ, ഇന്ത്യൻ ആർമി ഗ്രീൻ
