ഫ്രഞ്ച് പ്രതിരോധ താരം ക്ലെമെന്റ് ലെങ്‌ലെറ്റ് അത്‌ലറ്റിക്കോ മാഡ്രിഡുമായി 3 വർഷത്തെ സ്ഥിരം കരാറിൽ ഒപ്പിട്ടു. താരത്തിന്റെ ബാഴ്‌സലോണയുമായുള്ള ദീർഘകാല കരാർ പരസ്പര ധാരണയോടെ റദ്ദാക്കിയതോടെയാണ് ഈ നീക്കം സാധ്യമായത്. ബാഴ്‌സലോണയുടെ കടുത്ത സാമ്പത്തിക പ്രതിസന്ധിയും ഫിനാൻഷ്യൽ ഫെയർ പ്ലേ (FFP) നിയമങ്ങൾ പാലിക്കേണ്ടതിന്റെ ആവശ്യകതയുമാണ് ഈ നിർണായക തീരുമാനത്തിന് പിന്നിൽ.
2027 വരെ ബാഴ്‌സലോണയുമായി കരാറുണ്ടായിരുന്ന ലെങ്‌ലെറ്റിന് പ്രതിവർഷം ഏകദേശം 16 ദശലക്ഷം യൂറോയോളം (ഗ്രോസ്) ശമ്പളമുണ്ടായിരുന്നു. ഈ ഉയർന്ന വേതനം ക്ലബ്ബിന് വലിയ സാമ്പത്തിക ഭാരമായിരുന്നു. താരത്തെ വിൽക്കാൻ മുമ്പ് ശ്രമിച്ചിരുന്നെങ്കിലും ഉയർന്ന ശമ്പളം കാരണം അത് ഫലവത്തായില്ല. അതിനാൽ, ട്രാൻസ്ഫർ ഫീസ് ഒഴിവാക്കി കരാർ റദ്ദാക്കി വേതന ബാധ്യത കുറച്ച് ക്ലബ്ബിന്റെ FFP നില മെച്ചപ്പെടുത്താനാണ് ബാഴ്‌സലോണ തീരുമാനിച്ചത്.
ലെങ്‌ലെറ്റിന്റെ ശേഷിക്കുന്ന ശമ്പളത്തിന്റെ ഒരു ഭാഗം ബാഴ്‌സലോണ നൽകുകയും, ബാക്കിയുള്ള തുക താരം വേണ്ടെന്ന് വെക്കുകയും ചെയ്തതോടെയാണ് കരാർ റദ്ദാക്കാനുള്ള ധാരണയിലെത്തിയത്.
കഴിഞ്ഞ സീസണിൽ ലോണിൽ അത്‌ലറ്റിക്കോ മാഡ്രിഡിൽ കളിച്ച ലെങ്‌ലെറ്റ് മികച്ച പ്രകടനം കാഴ്ചവെച്ചിരുന്നു.
