ജർമ്മൻ ബുണ്ടസ് ലീഗയിൽ ആദ്യ രണ്ടു സ്ഥാനക്കാർ തമ്മിലുള്ള പോരാട്ടത്തിൽ ബയേൺ മ്യൂണികിനെ 2-2 നു സമനിലയിൽ തളച്ചു ഒന്നാം സ്ഥാനക്കാർ ആയ ബയേർ ലെവർകുസൻ. ബയേണിന്റെ മൈതാനത്ത് തുടക്കത്തിൽ അവരുടെ ആധിപത്യം കണ്ടെങ്കിലും തുടർന്ന് സാബി അലോൺസോയുടെ ടീം മനോഹരമായി കളിച്ചു കളം ഭരിക്കുന്നത് ആണ് കാണാൻ ആയത്. എന്നാൽ ലഭിച്ച അവസരങ്ങൾ മുതലാക്കാൻ സാബിയുടെ ടീമിന് ആയില്ല. മത്സരത്തിൽ ഏഴാം മിനിറ്റിൽ തന്നെ കോർണറിൽ നിന്നു ലഭിച്ച അവസരത്തിൽ നിന്നു ഫ്രീ ഹെഡറിലൂടെ ഹാരി കെയിൻ ബയേണിനെ മുന്നിൽ എത്തിച്ചു. ലീഗിലെ നാലാം ഗോളും ക്ലബ് കരിയറിലെ 300 മത്തെ ഗോളും ആയിരുന്നു ഇംഗ്ലീഷ് ക്യാപ്റ്റന് ഇത്.
എന്നാൽ തുടർന്ന് കണ്ടത് ലെവർകുസന്റെ മനോഹര ഫുട്‌ബോൾ ആണ്. മത്സരത്തിൽ 24 മത്തെ മിനിറ്റിൽ ലഭിച്ച ഫ്രീകിക്ക് അതുഗ്രൻ ഷോട്ടിലൂടെ ഗോളാക്കി മാറ്റിയ അലക്‌സ് ഗ്രിമാൾഡോ സാബിയുടെ ടീമിന് അർഹിച്ച സമനില ഗോൾ നൽകി. തുടർന്ന് ഒന്നാം പകുതിയിലും രണ്ടാം പകുതി തുടക്കം മുതലും ലെവർകുസൻ നിരവധി അവസരങ്ങൾ ആണ് സൃഷ്ടിച്ചത്. എന്നാൽ മുന്നേറ്റനിര താരം ബോണിഫേസ് ഈ അവസരങ്ങൾ പലതും പാഴാക്കി. ബോണിഫേസ് ഏതാണ്ട് മധ്യനിരയിൽ നിന്നു തൊടുത്ത ഉഗ്രൻ ഷോട്ട് ബാറിന് തൊട്ടു മുകളിലൂടെയാണ് പോയത്. ഇടക്ക് ബോണിഫേസ് നൽകിയ പാസിൽ നിന്നു വിർറ്റ്സ് തൊടുത്ത ഷോട്ട് പോസ്റ്റിൽ തട്ടി മടങ്ങി. അവസാന നിമിഷങ്ങളിൽ പകരക്കാരെ കൊണ്ടു വന്ന ടൂഹലിന്റെ നീക്കത്തിന് ഫലം ആയിരുന്നു ബയേണിന്റെ രണ്ടാം ഗോൾ.
യുവതാരം മാതിയസ് ടെൽ നടത്തിയ മികച്ച നീക്കത്തിന് ഒടുവിൽ നൽകിയ പാസിൽ നിന്നു 86 മത്തെ മിനിറ്റിൽ ഗൊരേസ്ക ബയേണിനു വിജയം സമ്മാനിച്ചു എന്നു തോന്നി. തൊട്ടടുത്ത നിമിഷം തന്നെ മികച്ച നീക്കം നടത്തിയ ലെവർകുസൻ സൃഷ്ടിച്ച അവസരം ബോണിഫേസ് വീണ്ടും കളഞ്ഞു. എന്നാൽ ഇഞ്ച്വറി സമയത്ത് ഹോഫ്മാനെ അൽഫോൺസോ ഡേവിസ് ഫൗൾ ചെയ്തതിനു വാർ പരിശോധനക്ക് ശേഷം റഫറി പെനാൽട്ടി അനുവദിച്ചു. തുടർന്ന് പെനാൽട്ടി എടുത്ത പകരക്കാരനായ പലാസിയോസ് ലെവർകുസനു അർഹിച്ച സമനില സമ്മാനിക്കുക ആയിരുന്നു. ഉണ്ടാക്കുന്ന അവസരങ്ങൾ മുതലാക്കാൻ ആവുന്നില്ല എന്ന സങ്കടം അലട്ടും എങ്കിലും ബയേണിന്റെ മൈതാനത്ത് സമനില നേടാൻ ആയത് സാബിയുടെ ടീമിന് നേട്ടം തന്നെയാണ്.
