ഇംഗ്ലീഷ് പ്രീമിയർ ലീഗിൽ ലിവർപൂളിന്റെ ക്ലാസിക് തിരിച്ചുവരവ്. ഇന്ന് ആൻഫീൽഡിൽ ബ്രൈറ്റണ് എതിരെ ഒരു ഗോളിന് പിന്നിൽ പോയ ശേഷം രണ്ടാം പകുതിയിൽ തിരിച്ചടിച്ച് വിജയിക്കുകയായിരുന്നു ലിവർപൂൾ. 2-1 എന്ന നിലയിലാണ് കളി അവസാനിച്ചത്.
മത്സരത്തിൽ 14ആം മിനുട്ടിൽ റൈറ്റ് വിംഗർ ആയി കളിച്ച കദിയോഗ്ലു ആണ് ബ്രൈറ്റണ് ലീഡ് നൽകിയത്. ആദ്യ പകുതിയിൽ ബ്രൈറ്റണ് ലീഡ് ഉയർത്താൻ നല്ല അവസരങ്ങൾ സൃഷ്ടിച്ചു എങ്കിലും ലക്ഷ്യം കണ്ടില്ല.
രണ്ടാം പകുതിയിൽ 69ആം മിനുട്ടിൽ ഗാക്പോയുടെ ഒരു ക്രോസ് ജഡ്ജ് ചെയ്യുന്നതിൽ ബ്രൈറ്റൺ ഡിഫൻസിന് വന്ന പിഴവ് ലിവർപൂളിന്റെ സമനില ഗോളായി. ഈ ഗോൾ വന്ന് മൂന്ന് മിനുട്ടിനുള്ളിൽ സലായിലൂടെ ലിവർപൂൾ ലീഡും എടുത്തു. തന്റെ ഇടതു കാലിൽ കട്ട് ചെയ്ത് ബോക്സിലേക്ക് കയറിയ സലാ മനോഹരമായ ഒരു ഷോട്ടിലൂടെ പന്ത് വലയിൽ എത്തിക്കുക ആയിരുന്നു. സ്കോർ 2-1.
ഈ വിജയത്തോടെ ലിവർപൂൾ 25 പോയിന്റുമായി ലീഗിൽ ഒന്നാം സ്ഥാനത്ത് നിൽക്കുകയാണ്. ബ്രൈറ്റൺ 16 പോയിന്റുമായി ഏഴാം സ്ഥാനത്തും നിൽക്കുന്നു.
