വനിതാ ഫുട്ബോൾ ലോകകപ്പിൽ ഇന്ന് നടന്ന ശക്തരുടെ പോരാട്ടത്തിൽ ഫ്രാൻസിനോട് ബ്രസീൽ പരാജയപ്പെട്ടു. ആവേശകരമായ മത്സരത്തിൽ 2-1ന്റെ വിജയമാണ് ഫ്രാൻസ് സ്വന്തമാക്കിയത്. ആദ്യ മത്സരത്തിൽ പനാമയെ തോൽപ്പിച്ച ബ്രസീലിന് ഫ്രാൻസിനെതിരെ ആ മികവ് മതിയായില്ല. മികച്ച അവസരങ്ങൾ സൃഷ്ടിച്ചും പന്ത് കൂടുതൽ നേരം കൈവശം വെച്ചും ഫ്രാൻസ് കളിയിൽ മികച്ചു നിന്നു.
17ആം മിനുട്ടിൽ ലെ സൊമ്മറിന്റെ ഗോളിൽ ഫ്രാൻസ് ആണ് ലീഡ് എടുത്തത്. ആദ്യ പകുതിയിൽ ആ ലീഡ് നിലനിർത്താൻ ഫ്രാൻസിനായി. രണ്ടാം പകുതിയുടെ തുടക്കത്തിൽ ഒലിവേരിയയിലൂടെ ബ്രസീൽ സമനില നേടി. 83ആം മിനുട്ടിൽ വിൻഡി റെനാർഡ് ഫ്രാൻസിന്റെ വിജയ ഗോൾ നേടി.
ഈ വിജയത്തോടെ 4 പോയിന്റുമായി ഫ്രാൻസ് ഗ്രൂപ്പിൽ ഒന്നാമത് നിൽക്കുന്നു. ബ്രസീൽ 3 പോയിന്റുമായി രണ്ടാമതും നിൽക്കുന്നു. ജമൈക ആകും ബ്രസീലിന്റെ അവസാന മത്സരത്തിലെ എതിരാളികൾ. ഫ്രാൻസ് പനാമയെയും നേരിടും.
